De drie Keuninge zien ouch weer op de truukwaeg en noe kènne veur ós gans gaon richte op de Vastelaovend. ‘t Begint noe ech te kriebele. De raod en ‘t besjtuur höbbe ‘t aafgelaupe weekend al flink gepreuf aan ‘t nieje sezoen middels de niejaorsróndjgang höb ich mich laote vertelle. Ich haop det geur allemaol veilig thoes gekómme ziet. Volgend jaor kènne veur det ouch van doeën bie meimake. Ich laes det ‘t nieje Boerebroedsjpaar ouch al van zich haet laote hure. Prefisiat mèt uch oetverkezing. Sjoeën óm te laeze det geur ouch regelmaotig mèt uch köpkes örges angers ziet. Det kump mich hiel bekend veur. Veur winse uch ouch väöl plezeer ónger elkaar in deze tied van zjwiege. Ich laes det Eks-Prins Ron gereageerd haet in ‘t Daagbook. Veur geniete inderdaad volop van deze tied. En jao ich blaos aaf en toe waal ‘ns op ‘n fluit maar of det zoe musikaal is … ? Dao mótte angere maar euver oerdeile. Kómmend weekend sjteit de vrouwluu- en hierezitting bie de Paerssjtal op ‘t program. Veur idderein dae dao nao toe geit: hiel väöl plezeer. Messjien det ich zondag ouch gaon maar det weit ich nag neet. Móch det waal zoe zien den zeen veur ós dao. Wilt geur nagh get weite, vraoge sjteit vrie. Toet de volgende kier.
Sjtum op de veterane van RevocVCB
De veterane van volleybalclub Revoc-VCB höbbe mèt häöre sjlaeger “Kop veur de Vastelaovend” de halve finale van ’t Limburgs Vastelaovesleedjes Konkoer bereik. Kómmende vriedaag, 9 jannewarie, beklumme de hieëre ’t halve finale-podium in de L1 sjtudio in Mesjtreech. Dees halve finale waert tösse 18 en 20 oeër live oetgezonde op L1 TV en radio. Zaoterdaag 10 jannewari waert dees oetzending herhaold, tösse 10 en 12 oeër. Nao beide oetzendinge höbbe kiekers en loesteraers ’n half oer de tied óm via sms of tillefoon te sjtumme, en zoeë te bepaole welke liedjes de groeëte LVK finale bereike.Veur haope natuurlik det de Ruiver daobiej zit en auch geur kènt daoveur zorge, door op de Kop veur de Vastelaovend (liedje nummer 32) te sjtumme. Óm alvas in de sjtumming te kómme: http://youtu.be/ToL6x9vBaTE Wie kèn d’r gesjtump waere? Dit jaor gèn geknip en geknutsel mèt bónne oet de gezèt… dit jaor kèn d’r allein via de tillefoon gesjtump waere, ’n half oer nao aafloup van de oetzending (dus kómmende vriedaagaovend tösse 20 en 20.30 oeër en zaoterdaag tösse 12 en 12.30 oeër). D’r mot op 3 liedjes gesjtump waere, maar zorg in idder geval det liedje 32 d’rbiej zit!SMS SMS nao 4422 en sjtum beveurbeeld LVKspatie32spatie33spatie34. In dit veurbeeld op liedje 32, 33 en 34. Gebroek allein LVK veur ’t ierste leed en veur ’n spatie in tösse de nummers van de liedjes. Per tillefoonnummer moogs-se maar eine kieër sjtumme.Belle Belle kèn auch en auch noe moogs-se maar eine kieër ein sjtum oetbringe per tillefoonnummer. Bel nao 0909 202 70 30 en den kriegs-se instructies via de tillefoon. Veur ’t ierste leed in en sjloet aaf mèt ’n hekske (#), veur den ’t twieëde leed in en sjloet aaf mèt ’n hekske en veur den ’t derde leed in en sjloet aaf mèt ’n hekske.Mieër info en tekste van alle liedjes op www.stichtinglvk.nl. Zorg in idder geval natuurlik det liedje 32 d’rbiej zit, en wae wèt…
Van “Men in Black” nao Men in Pek
Zoe, de körsbaum is oet de kamer, de waofels en aolieböl zien op. 2015 is begós en wat zal dit ein geweldig jaor veur ós waere. Nag minder as 3×11 daag toet de Oscar oetreiking en den sjtaon ich same mèt mien angere 2 filmsjterre op de bühne in de Sjakel. Wat geit dae tied sjnel. Noe geit ‘t ech beginne. De ieërste vastelaovesactiveite sjtaon al has veur de deur. Maar wat höbbe veur al ‘n lol gehad same mèt de adjes en ‘t thoesfront. Die blikke ónger mekaar as ‘ne boetesjtaonder örges ‘n opmerking euver maak. Die móste ‘ns weite. Zjwiege lök ós toet nag toe good. Ouch zien veur in de tössetied al bie de kleijermaker gewaes. Nao get passe en maete höbbe ze toch nag get kènne vinje en dao sjtinge veur den in ózze nieje outfit. Van “Men in Black” nao Men in Pek. Geweldig. ‘n Paar daag later foto’s knippe örges wiet boete de Ruiver. Pekske aan, mantjel óm, sjteek mèt vaere oppe kop en dae knöppel in de henj. Ouch de adjes veur ‘t ieërs in vol ornaat. Sjiek; zuut d’r good oet. En wat höbbe veur dao gelache mèt die van de Peekaa. Wat eine óngerein. Bön beniejt wie al die filmposters d’r oet kómme te zeen. Maar det geit hielemaol good kómme. Bie de adjes en bie mich thoes zien de veurbereijinge ouch al in vólle gang. De vrouwluu zien ouch al op paad gewaes veur pekskes en heudjes. Det zuut d’r allemaol good oet. Ouch de Vastelaovesleedjes: die kènne veur vanaaf noe mèt ein gerös hert aan laote sjtaon zónger det emes d’r gek van op zal kieke. Miense hie wil ich ‘t veur noe bie laote. Höb geur vraoge, sjtel ze gerös. Toet de volgende kier. De nieje mèt zien filmcrew
Prinsebal 2015
Windjbuujelinnekes en Windjbuujels, in ’t nieje sezoen is ’t vereinigingsthema: Néét te filme. ’n Echte Oscaroetreiking is de roeije draod waomei de Prinsekemissie ’t nieje trio zal bekend make. Veur laote ós gaer weer verrasse wie dèt geur uch verkleid óm dit thema te óngersjtrepe. ’t Waerd in idder geval weer ‘ne keigezellige aovend met meziek van de fieësbend PATS! Wilt g’r d’r bie zien? Rizzerveer ug dèn de datum: zaoterdig 31 fjannewarie 2015, vanaaf 20.30 oer. Hiejonger kènt geur alvas de genomineerde bekieke. Sjtum middels ’n berichje – veurzeen van eige naam en emailadres en de naam van de genomineerde – in ’t gastebook of ‘like’ ’t betröffende berichje/video van de genomineerde op Facebook en maak kans op ein van de 33 VIP kaarte veur ’t Prinsebal.
Mien ieërste verhäölke
Leef Windjbuujels en Windjbuujelinnekes, Noe zit ich hie naeve de körsbaum veur uch aan mien ieërste verhäölke. Wat sjteit mien laeve al ein paar waeke oppe kop. Nag veur det dae angere met de baard de pekskes haaj gebrach kreeg ich al ‘t allersjónste kedo wat ‘ne Ruivernaer zich kèn winse. Op eine – zoe wie se dinks – gewuuëne aovend ging de tillefoon en verangerde mien laeve kompleet. Veur loge net lekker oppe bank toen emes zag: “Mèt Sjmul” en hae vroog: “Bös se thoes en höbs se beer? Den kómme veur d’r zoe aan”. Nag veur det ich klaor waar mèt razele sjting de Peekaa bie mich in de kamer. Lang höb ich neet nao hove te dinke en kwaam ‘t beer op taofel. Ich wis ‘t geliek. Ich wil hiel gaer dae nieje waere van 2015. Neet te filme. Natuurlik wil ich dees hoofrol sjpele maar de filmcast mós oetgebreid waere mét 2 mede-houfrolsjpelers, die same mèt mich dees film wille opnimme. Nao ‘n paar sjlaopeloze nachte van de sjpanning höb ich die angere filmsjterre gevraog en die ware geliek enthousias. Det waar dus sjnel geregeld. Mèt de res: kostuums, attribute en filmposters zien veur ouch al drök bezig maar dao euver de volgende kier mier. Noe effe truuk nao de orde van de daag. Nag ‘n paar daag en den zit 2014 d’r weer op. Ein jaor mèt ein geweldig trio: Prins Geert mèt zien adjes Rick en Mark. ‘t Kós neet gekker. Mien adjes en ich winse uch nag ein paar sjoeën waeke as trio en geniet nag van alles wat nag kómme geit. As lètste wil ich de hiere van Revoc/VCB prefisiat winse mèt ‘t behaole van de halve finale van ‘t LVK. As geur de finale haolt, mien sjtum höb geur. Den res mich idderein ein gelökkig en gezóndj “neet te filme” 2015 te winse. Toet de volgende kier.
Fijne fieësdaag!
Beste vastelaovesvierder, Veur winse uch fijne fieësdaag en ’n gelökkig, gezondj en vastelaovesvol 2015 toe! Vastelaovesvereiniging de Windjbuujels
Veterane van RevocVCB in halve finale LVK
Aafgeloupe maondig zien de 60 halve finaliste van ’t LVK 2015 oet 218 inzendinge bekendgemaak. En jao ouch dit kier zit d’r ’n Ruiverse inzending bie. De Veterane van RevocVCB zien mèt häör nummer ‘Kop veur de vastelaovend’ zien door nao de halve finale van vriedig 9 jannewarie. Hieëre, names de vereiniging van herte prefisiat alvas mèt ’t behaole van dit resultaat en waem wet ….
Veurverkoup Sjterzittinge
Op zóndig 28 desember is de veurverkoup van de Sjterzittinge. Veur leje start de veurverkoupom 10.30 oer. Neet-leje kènne vanaaf 11.00 oer kaarte koupe. De ieërste Sjterzitting is op zaoterdig 17 jannewarie. De twiede op zaoterdig 24 jannewarie. ’t Programma besjteit o.a. oet: Har Daniëls / Gilbert Petit Da Ma Zoeë De Ruiver dreijt door… Ton Donders Duo Oetgesjlaope en ós eige Bendellef
Vastelaovend am Weissen Stein
Op vriedigaovend 13 fibberwarie 2015 wille veur weer same mèt uch de offisjele äöpening van de vastelaovend viere.Op deze aovend, sjpesjaal bedoeld veur de get aajere jeug mèt ‘nne laeftied vanaaf 2×11 jaor, gaon veur truuk in de tied mèt vastelaovesliedjes van jaore ’80 en ’90. Meziek dae de vastelaovend in dae tied sjpesjaal maakde en gebrach door artieste oet dae tied. Ouch dit jaor höbbe De Windjbuujels weer bösse veur uch geregeld die tösse 19.30 en 20.30 oer op en neer pendele tösse Ruiver/Óffebek en de Witte Stein, en die uch later oppe aovend tösse 01.00 toet 2.00 oer in ’t dörp weer aafzitte. Gewuuën good geregeld dus………en det veur € 5,– incl. entree! Wilt g’r dit neet misse? Zorg den det geur sjnel ug kaarte rizzerveert. Dit kén door uch aan te melde door ‘nne mail te sjture nao vaws@windjbuujels.n Gerisserveerde kaertjes ként g’r aafhaole in de Sjakel van 19:30-20:30 oer op; – donderdig 29 jannewarie – woensdig 4 fibberwarie Gaef duudelik aan mét wievuuël persoeëne geur ziet. Kaarten zien vanaaf 17 jannewarie auch verkriegbaar biej de volgende veurverkaupadresse; – Oppe Ruiver: Café De Witte Stein, Loek Natuurlijk, De Schakel, Gewoon Basic – In Beesel: Kapsalon Totall Image, Café De Troubadoer Zorg det geur d’r sjnel biej ziet, want vol = vol!
Diner des Buutes oetverkoch!
De veerde edisie van Diner des Buutes is kompleet oetverkóch. Illik jaor kriege de sjponsore en leje van Kómpagnie de Ruiversche Tróm als dank veur häör jaorlikse finansjele sjteun veuraaf de gelaegenheid om kaarte te risservere veur Diner des Buutes. Dit jaor is dao gretig gebroek van gemaak. Mèt ’t eindresultaat det alle besjikbare kaarte veur Diner des Buutes op 7 desember zien gerisserveerd. Wilt geur mieër informasie euver ós sjponsormeugelikhede den laot ’t ós weijte via ‘nne email aan sjponsoring@windjbuujels.nl of vraog ein van de besjtuursleje. Of wilt geur lid waere van Kómpagnie de Ruiversche Tróm? Sjtuur den ‘nne email nao pr@windjbuujels.nl