Windjbuujelsis d’r ouch dit jaor in gesjlaag om ’n gezellig, leuk en amusant programma op te sjtelle. Confetti, Sjeiv, Clown Rinaldo, de LaLaLadies, dansgroepen en anger verrassingen van eigen baodem gaon der weer ‘nne gezellige middaag van make veur ós jongste vasteloavesvierders. De entree is neturlik weer gratis! De lokasie is ouch dit jaor weer in zalencentrum de Sjakel oppe Ruiver. De zaal geit om 14.00 oer aope en ’t programma begint om 14.30 oer! Toet den, Windjbuujelsjeug
Trailer Jeugprinsebal 2014
Bekiek ‘m noe! [youtube]http://http://www.youtube.com/watch?v=MnK5vBcfofA[/youtube]
Jeugprinsebal vriedig 24 jannuwari! Downtown Ruiver!
De veurbereidinge veur ’t jeugprinsebal dreije op volle toeren. De nieje jeugprins of -prinses zit mèt kriebels thoes oppe bank. Mike telt met pieën in ’t hert zien letste daage as prins aaf. De knommelkemmissie maakt nog get kleine aanpassingen aan ’t decor. De pk is drök in de waer met met allerlei aafspraoke. Wat der geit gebeure vriëdaag 24 jannuwari? Det hingk in de lóch. Ein dingk is echter zeker! Downtown Ruiver is ’t vriedigaovend te daon. Rondj de klok van 21.11 oer weite veur waem de nieje jeugprins of – prinses is gewaore en geit ’t daak d’r aaf in Ronckenstein. Det wilt geur toch neet misse!
Hubo Reuver
https://www.hubo.nl/reuver
’t Pas…
Windjbuujelinnekes en Windjbuujels, ’t Pas en den höb ich ’t natuurlik euver mien vastelaovespak van dit jaor. Mien co-pilote en ich mótte veurdet veur ós oppe Ruiver bekend make nag eine tössesjtop in Italië make. Veur merke noe aan alles det ’t in de lóch hingk. Aafgeloupe zaoterdig de Harie’s in de halve finale en ’t gastebook begint ouch te laeve. Leuk, eks-prins Ron I det geur reageerde en noe de T.O.D. van zich luuët hure bön ich geliek in de pen geklómme. Ich haop veur uch det geur op ’t goeje sjpaor zit maar det weit geur pas zeker op 15 fibberwari. Wao geur waal geliek in höb is det ich van links nao recht vleeg. Drök op ’t werk en drök in ’t köpke. Gelökkig sjteunt ’t thoesfront mich en soms dink ich zelfs waal ens det de kinjer get doorhöbbe maar effe later is die gedachte weer weg as ze weer fijn doorsjpele. Detzelfde geldt veur mien twieë co-pilote en ós sjtewardesse. Same lache veur ós kepot en wie dök det veur al gezag höbbe: me mós ens weite. Mien veurgengers zalle det waal kènne be-ame. ‘ne Sjoeëne tied! Nag ein waek en den waert de ieërste hoeëgheid van 2014 bekend gemaak en zal biej de jeug ’t vastelaovesblood alvas sjneller gaon sjtruime. Dit weekend de ieërste activiteite: zaoterdig de vrouwluujzitting en zóndig zien de mansluuj aan de beurt. Ich wins de Windjbuujelinnekes en Windjbuujels die dao haer gaon väöl joeks en plezeer. Volgende waek huuërt geur weer van mich en geur weit: vraoge sjteit vriej! Captain Crazy en crew
Veur volge ’t nieje alkoholbeleid
In ’t nieje landelikke alkoholbeleid is de kastelein/zaaleigenaar verantwaordelik veur de oetveuring van dees wet. As vereiniging wille veur de oetveuring zeker sjteune. Daorom wille veur hie efkes bie sjtil sjtaon. – De nieje wetgaeving is d’r opgerich om gezondjheid- en veiligheidsrisiko’s van alkoholgebroeëk veur jongere en häör direkte omgaeving te veurkomme. – De campagne ‘Lekker Friz’ van de gemeintes in Noord- en Midde-Limburg is gerich op de matiging van alkoholgebroek door jongere. Veur mieër informasie euver de campage kènt geur de website http://www.lekkerfriz.nl/ bezeuke. – As vereinging volge veur de nieje wetgaeving en zulle ouch de instruksies van de kasteleins/zaaleigenare op dit gebied volge. – Veur de dudelikheid: jongere ónger de 18 moge gènne alcohol mieër koupe vanaaf 1 jannewarie 2014. Baovedeen moge ze in de aopenbare ruumte (det zien ouch kefee’s en zale) neet in’ t bezit zien van alkohol, ouch al is de verpakking nag gesjlaote. Det beteikent det jongere jonger den 18 jaor gen alkoholische dranke moge drinke tiedes evenemente van De Windjbuujels. – De kefee/zaalhajer is oeëteindelik verantwaordelik en zal dao ouch nao hanjele. As geur ter plaatse vraoge höb euver ’t nieje alkoholbeleid. Den sjtèl uch vraog aan ’t personeel det op det moment aanwezig is. Dit berich is zorgvuldig samegesjteld. Ondanks det kènne d’r onjuushede in sjtaon. Vastelaovesvereiniging de Windjbuujels is neet aansjprakelik veur eventuele gevolge hiejvan.
Beste Captain Crazy
Wat mot ich noe al laese! Geur ziet al ongerwaeges nao de Ruiver. Maar veur mooge toch nog effe? Nae veur weijte det ’t aaftelle is begonne maar duijt toch ein bietje pieën. Maar zoë huuërt ’t ouch te gaon. Ich höb begrepe det ’t nog ‘nne lange vluch wuuërt, om oeëteindelijk oppe Ruiver te lanje. Ich bön waal bliej det geur uch bemanning al höb oetgezoch. Zien de stewardesse d’r ouch al klaor veur? Bedank piloot veur de complimente aan ós trio. Veur höbbe ’t hieël gaer gedaon, en daon ’t ouch nag hieël gaer. Geur komt dalik in ‘nne waereld wao ’t erg onrustig is, maar waal op ein positieve manier. Zoelang det geur nog in de loch zit haof geur uch gèn zorge te make, maar zoedra geur dae boeïng op de grondj höb neergezat geijt ’t fiës beginne. Mien advies blief op de juuste huuëgte vlaege en haj de juuste koers aan, den kènt geur ouch zegge det die operasie gesjlaag wuuërd. Geniet van ’t sjpelke det der gesjpeeld geijt waere, maar ich begriep det geur det al ’n paar jaor mot sjpele! Ich ken ’t. ’t Wuuërt vanzelf 15 februari en toet dae tied geniete van alles wat komme geijt. Geur waert good begeleid door die PK, dus det kump allemaol good. En nao 15 februari geit i t ech gebeure, en det is ’n ervaring wat geur same met idderein gaot meij make. Veur as trio winse uche in goeije vluch, neet te misselijk he. Rès ós nag om aan idderein ’t beste te winse veur 2014. Maak d’r ein sjoeën jaor van. Groet, Prins Sjoerd den iërste met ziene linker Sjtan en rechter Andy
Insjrieve groeëte optoch op dónderdig 13 fibberwarie
Bèste Optochdeilnimmer(s), As geur dit jaor ouch weer mei wilt doon, let den op ’t volgende: De insjrieving veur de optoch zal dit jaor plaatsvinje op: dónderdig 13 fibberwarie van 19.00 oer toet 20.30 oer in ós Rizzedensie Kefee Ronckenstein. Maar is dit te vuuël werk? Of höb geur gènne tied of gèn zin óm nao de kroeg te gaon? Binnekort kènt geur ’t insjriefformulier downloade. Veur winse uch vuuël suukses mèt ‘t oetdinke en óntwikkele van uch krejasies en zeen uch gaer op de insjrieving. Mèt Vastelaovesgroet, Optochkemissie V.V. de Windjbuujels.
Ein good begin is…
Veurdet veur insjtappe en veur mèt vluch PK2014 ós in ‘t luchruim gaon begaeve mót d’r ieërs oppe gróndj nag ‘t ein en anger gaon gebeure. In plaats van sjtraks de sjmoking geit ieërs ‘t trainingspak aan óm kondisioneel good veur de daag te komme. De kilo’s van ‘t körsdiner en de aolieböl mótte d’r weer aaf! Ich zoog det “de vlegende kiep” zich ouch al drök maakde euver mien kilo’s. Ich weit det d’r maar 20 kilo per persoeën mei moog. Ich zit noe op 2×11 dus… Hoeëgheid prins Sjoerd I, ós sjtewardesse sjtaon veur ós klaor en die zorge d’r al veur det veur tiedes ós vluch van ‘n natje en ‘n droogje waere veurzeen. Zie zorge d’r ouch veur det de juuste koers wuuërt aangehaje. En eks-prins Coen II: “Bedank veur uch fillisitasies en de goeje tips. Veur zalle ós nag waal dökker sjpraeke de kómmende tied. Verder höb ich oet betroewbare bron vernaome det de raod häöre róndjgang weer achter de rök haet; waobie d’r nag flink gefieës is gewaore biej ózze Hoeëgheid prins Sjoerd I thoes. En de hermenie häör niejjaorskonzert: Wat waas det prachtig! ‘ne Sjoeëne aafsjloeter veur dirigent Laurens Hendrikx dae nao 19 jaor troewe deens de hermenie geit verlaote. En wat zal ‘t sjiek zien, leef Windjbuujelinnekes en Windjbuujels as veur d’r same veur zorge det ‘t winnende liedje van aafgeloupe liedjesaovend, “Dao hange de Sjlingers”, gesjreve door Nol Wassen en gezónge door de Harie’s, ein plaetske verdeend in de finale van ‘t LVK. Dus help mei en vul de bon oet de Limburger in, kómmend weekend of loester zaoterdig 11 jannewarie tösse 12.00 oer en 12.30 oer nao L1 en sms LVK20 nao ‘t nummer wat geur den huuërt. ’t Hingk in de lóch, vastelaovend 2014 is weer ‘n sjtökske donderbie. Elke waek geit ‘t noe helder kriebele en veur mich en mien co-pilote wuuërt ‘t sjteeds sjpannender. Captain Crazy en crew…
Oproop veur de CD verkoup
’t Nieje vastelaovesseizoen is weer begós. De Windjbuujels make zich op veur de kómmende vastelaovend. ‘nne vastelaovend ónger ’t thema : ’t Hingk in de lóch. Ouch dit jaor is d’r weer ‘n cd opgenaome. Op dees cd sjtaon de nummers 1, 2 en 3 van de liedjesaovend 2013 en de nummer 1 van de blageliedjesmiddig 2013. Ouch de nieje Intochmars van de Windjbuujels sjteit d’rop. De cd is wieër aangevuld mèt mieërdere sjlagers oet de aaj doeës. Wae wilt dees cd noe neet! Dees niej cd wuuërt aan ’t publiek te koup aangebaoje in ‘nne hoes-aan-hoes verkoup op zaoterdig, 18 jannewarie 2014, vanaaf 15.00 oer. De verkouppries is € 11,–. De cd wuuërt gepers in ’n oplage van 500 sjtöks. ’t Is meugelik óm ein (of mieërdere) cd biej insjrieving te rizzervere. As geur det nag neet gedaon höb kènt geur det nag doon via ’t niejsberich op dees website van 7 desember. Wilt geur zeker zien van ein eksemplaar den mót geur det zeker doon want veur wille juus uch neet teleursjtèlle as veur oetverkoch zien. Dus,… maak d’r werk van. De liedjeskemissie is drök doonde óm ’t ein en anger te organizere en jao, geur veult ‘m al, veur gaon uch vraoge óm uch mètwerking te gaeve aan de verkoup … veur gaon d’r van oet maar wille det toch zeker weite … dus miense, laot ós (gaer zoeë flot meugelik) efkes weite of geur mètdoot aan de hoes-aan-hoes verkoup op zaoterdig, 18 jannewarie 2014. Waal of neet…Mail dit efkes truuk nao shannenbeijers@home.nl Names de liedjeskemissie, Shannen Beijers