2024 Leef Windjbuujelinnekes en Windjbuujels,  Op de ieërste plaats de beste winse veur 2024! Ziet geur allemaol de jaorwisseling good doorgekómme? Tiedes de niejaorsnach höbbe veur al get danspasjes geoefend. De sjoon zien waal al vettig van ’t oppe tiene sjtaon maar gelökkig höbbe veur nag efkes.   Ich höb begrepe det ’t bie ós boerebroedspaar Luc en Ans waal erg spektakulair waas mèt de niejaorswisseling. En bie Ronckesjtein waas ’t z’n knalfieës det ’t daak nag net neet d’raaf ging maar waal de roete d’roet. Verder höbbe veur waal van ’t vuurwerkkabaal gebroek gemaak óm ‘t van de daake te sjrieuwe. Haopelik haet nemes ós gehuuërd.  Dao is d’r den! ’t Nieje jaor…2024. Veur ós ’n biezónjer jaor. Op de ieërste plaats wil ich via deze digitale waeg alves Jeugdprins Hero mèt zien adjudante Casper en Kevin fillisitere. Euver ’n paar daag zeen veur ós en kènne veur same oppe kis sjpringe. Toet dae tied moog ze mèt Hoeëgheid Prins Mark I d’r alves bieëstige fieësjes van make. De Buutte-aovend, Sjterzitting en Kinjerzitting sjtaon namelik kómmend weekend veur de deur en wat haet ’t Windjbuujelriek dao zin in. De Sjterzitting is namelik oetverkóch. Want wil se 2024 éch gezondj beginne? Den mos se veural väöl lache. Want lache is gezóndj en det kèn oppe zittinge en buutte-aovend.  Höb geur trouwens ’t filmke van de PeeKaa al gezeen op social media? Die men höbbe weer get kunstigs bedach. Kries se binnekort ’n sjilderie in henj? Den voeg dien ‘oet de kuns’ sjtökske toe en plaats ’t op social media. Veur kènne neet wachte óm dees kunswerke de 27ste te aansjouwe.  Kleine tip van de nieje: dink aan goeij verf die hoeëge temperature kènt verdrage, want in gallerie de Sjakel kós ’t waal ens good heit waere. Wat betröf de vorderinge geit ’t gestaag. Helaas höbbe veur waal get extra ketoeën motte plökke, want aan de Körstaofel höbbe veur mieër den allein oppe lip gebete. En ‘t bliek ouch det se de vaere neet ónger ‘n sjtriekiezer kèns doon. Maar… genne paniek mien adjudante zien al óngerwaeges nao ’t Dierenryck. Beniejd wao ze mei truukkómme. De volgende oet-te-rope Hoeëgheid sjteit besjlis net wie ós te popele óm oet te komme. Es ieërste in ’t riejke is de nieje Bacchus aan de beurt. Welke groep geit de Ruiver dit jaor ‘onveilig’ make. Bacchus Dirk haet mèt zien Bacchante de vastelaoveslat hoeëg gelag aafgeloupe jaor. Dus nieje Bacchus en Bacchante de oetdaging ligt d’r.  Ich gaon noe toch ens richting ’t Dierenryck. Kieke of ’t wilt lökke mèt de vaere? Toet sjnel!De nieje

DAAGBOOKDEIL 3, Körs euversjlaon en Vastelaovend d’rin? Leef Windjbuulinekkes en Windjbuujels, Noe det geur al ’n bietje höb kennisgemaak mèt miene linker en rechter is ’t weer aan mich óm get mèt uch te deile. Väöl wiezer ziet geur waarsjienlik toch neet gewaore van die twieje… Inmiddels sjtaon de Körsdaag veur de deur en gaon veur hel richting 2024. Als ’t aan mich lik sjlaon veur de Körsdaag euver en gaon veur gelieëk door nao de Vastelaovend. Want aan det wachte liek maar gein inj te kómme. Wat ‘ne lange zit! Bienao onmienselik. Ieërs nag mer ens aan de Körstaofel oppe lip biete. En haopelik ouch nag op allerhande lekker aete. Maar óngertösse mót d’r nag steeds genog gebeure.  ’t Lieske waert nag neet èch korter. Veur mótte de ketoeën veur de hemde nag plukke en de vaere nog sjtrieke, de sjoon nag inloupe. Ouch zoeë get… ’n advies van de PeeKaa: “Loup dich de sjoon good in”.  Maar wie duis ze det? As ich mèt dees blinkende, nieje sjoon door de Albert Heijn loup den zou det miense messjiens waal kènne opvalle. Ich bön al sjoe óm noe vastelaovesmeziek te dreije, laot sjtaon mèt nette, zjwarte sjoon door de Albert Heijn te loupe. Den kèn ich ’t net zoeë good drek van de dake sjrieuwe (en geluif mich…, det zou ich ’t leefste doon): “Laot de vastelaovend maar kómme!” Euver vastelaovesmeziek gesjpraoke. Wie dink geur dao euver? Ich merk dök det de ajere ‘garde’ de meziek wie Vleisboeket versjrikkelik vinje. Oeëtsjpraoke as: “Det is genne vastelaovesmeziek” waere dao väölal bie gebrach. Ich höb ’t idee det de grieze generasie den ouch mieër nao de Venlose meziek neig.  De jeug geit dao-in taege los op de Roerdasse. As ich nao michzelf kiek kèn ich ’t allebei waal waardere. De waereld sjteit noe einmaol neet sjtil en zoeëlang ós sjoeën Limburgse taal ’n rol sjpeelt in de vastelaovesmeziek, huuërt geur mich neet knotere.  Zoeë as geur weijt, zien de halve finaliste van ’t LVK inmiddels bekend. Ens kieke of d’r get tösse zit wat veur sjoeën vinje. Vriedig 5 jannewarie beginne de halve finales van ’t LVK alweer maar nag väöl sjónder, den waert de ieërste Hoeëgheid in ’t Windjbuujelriek oetgerope! Daomei wil ich geliek Prins Mark mèt zien adjudante nag väöl plezeer winse de kómmende waeke! De letste luuëdjes zien ’t zjwaorste, waert döks gezag. Veur noe winse veur uch alvas sjoeëne Körsdaag en ‘ne goeije roetsj nao 2024! De nieje mèt zien adjudante Prinsraoje: https://windjbuujels.nl/prinsraoje

DAAGBOOKDEIL 2 VAN DE ADJUDANTE VAN DE NIEJE – Sinterklaos d’roet, Vastelaovend d’rin? Daag Windjbuujelinnekes en Windjbuujels, Noe de sjtoumboeët zien anker al ’n paar daag geleje haet gelich, zien veur – adjudante – aan de beurt óm ens get mèt uch te deile. Bie deze ós ieërste biedrage. Gaer wille veur ’n serieus wäördje toet uch richte, want van de nieje Hoeëgheid, waert geur ouch nieks wiezer.  Wat waerde veur ’n tiedje geleje ontzettend verras door ózze en sjtraks ouch uche nieje Hoeëgheid. In ‘t verleje hadde veur d’r waal ens euver gespekuleerd, maar toen de vraog der vraoge éch kwaam, sjtinge veur éch mèt ózze mondj vol tenj. Euverigges waal maar hieël efkes. De vastelaovesvreugde waas daonao nauweliks te euverzeen.  Veur koste ‘t de ieërste paar daag nag nauweliks geluive. De ieërste waeke leek ‘t waal asof de ganse Ruiver nao ós keek. De sjpanning en adrenaline raasde door ós vastelaovesblood. ‘t Besef kwaam nag ens éch toen lets de pakke gepas waerde. Nette sjoon aan, sjtrak pekske… det maakde ‘t inens éch éch. Hoewaal ouch weer get onwerkelik. Same mèt de Hoeëgheid, ós aanhang en de PeeKaa volgde sjnel ‘n aantal sjoeën aovende. Mèt prakkezere, sjetse oetwerke en netuurlik ‘t nuuëdige ‘inhoudelike’ gewazel. De ieërste invullinge waerde sjnel duudelijk. Det ging dus bes hel. Te hel messjiens waal. Aan de angere kantj sjtaon d’r nag ‘n paar gezellige veurbereidingsaovende gelökkkig op ós te wachte. Euver gezellige aovende gesjpraoke… ózze goedheiligman is gelökkig vertrókke. Rös in de tent. Harstjtikke fijn, haje we nag get pieke euver veur de vastelaovend. Mèt anger wäörd: Sinterklaos d’roet, vastelaovend d’rin. Toch?’t Vertrek van Sinterklaos is tegeliekertied waal de bevestiging det de 27ste jannewarie rap doenderbie kump. Det merke v’r ouch aan ós omgaeving. ’t Prinsraoje kump op sjtaom. Det is sjiek óm mei te make, maar maak ’t veur ós waal nag ens extra sjpannend. De miense róndj óm ós haer mosde ens weijte. Det de miense oet ós omgaeving relatief weinig van de omgaeving weijte, bleek waal oet de oetsjlaag van Ruiverpedia. Euveriges vónj m’n dit waal ‘n pittige edisie. Dit jaor waas d’r wederom maar ein ieërste plek veur al die teams, dus of ’t aan de teams loog, is maar de vraog. Uhhm… sjnap geur ’t nag? As v’r den toch nieks nuttigs mieër te zegge höbbe, kènne v’r maar net zoeë good doorgaon mèt ’t waer. Kaat hé, lets? Z’nne goeije höbbe v’r al lang neet mieër gehad. Dao bedoele v’r netuurlik noe waal ouch éch ’t waer mei. As det zoeë doorgeit zien v’r messjiens de ieërste die ’t neet te werm höbbe in de Sjakel mèt ‘t Prinsebal. Netuurlik gaon v’r d’r veur óm det daak d’r zoewiezoeë vanaaf te kriege. Toet de volgende kieër. Groete,De adjudante van de nieje Hoeëgheid

Alves ’n kedootje Daag Windjbuujelinnekes en Windjbuujels. ’t Is al get waeke geleje, maar höb geur ouch zoeë genaote van de Kermis dit jaor? Magnefiek waer en wat ‘n artieste bie de kefees dit kieër! Det waar ‘oet de kuns’. Nao de kermis telle veur idder jaor gaer aaf nao ‘t begin van de sjoeënste tied van ’t jaor; de vastelaovend. De Liedjesaovend en Bladeliedjesmiddig höbbe ós inmiddels weer ’n paar prachtige Ruiverse sjlaegers gebrach maar baove-al ouch ‘n terechte nominasie van Wiel Verlinden as Windjse Windjbuujel. Want wat zoude veur zien zónger alle vriewilligers die zich belangeloos inzette veur ós Windjbuujelriek en ’t behaad van ózze sjoeëne vastelaovend. Geweldig det d’r den zo’n beneuming is as de Windjse Windjbuujel. En Wiel winse veur ouch vanoet dees geheime plaats ‘ne dieke prefisiat. Mèt de ellefde-van-de-ellefde … lekker zunke, lekker windje, lekker waerke. Begós ’t vastelaovessezoen éch. Dit jaor veur ós waal ’n hieël biezónjer sezoen. Veur moge as trio kómmende vastelaovend uch veurgaon in ’t Windjbuujelriek! Ich – en daomei ouch mien adjudante – krege namelik de vraog der vraoge.Maar… wie ging det eigelik? Vrie eenvoudig. Ich waerde gebeld. Nao get gewazel, plande we ’n aafsjpraok en waerde ‘t gesjprek bes sjnel aafgeróndj. Mien ieërste reaksie thoes: “’t Zal toch neet…?”Die gedachte bleef de res van die daag toet aan de aafsjpraok waal ‘hange’. Op dae bewuste aovend det we hadde aafgesjpraoke, ging ich mèt toch ietwat sjpanning op paad. Gezellig in de keuke zote veur get te praote, toetdet de res van de PeeKaa binnekwaam. Toen sjlooge netuurlik alle sjtoppe door. Ich kèn uch zegge det ich toch zeker ‘n half oer höb gerazeld. Einmaol thoesgekómme hoofde ich allein maar ‘nne kieër jao te knikke. Wao op ich ‘nne jao truuk kreeg, ich weer jao knikte, weer ‘nne jao truuk kreeg. Enfin… geur sjnap ’t waal.Drek kwaam de vraog op: waem geit d’r naeve mich sjtaon? Dao ware veur sjnel euver oet maar det kump nag waal ‘ne angere kieër. De volgende oetdaging waas lastiger: wie gaon veur ze vraoge…? Ouch det deil, haje veur nog effe veur ós. Ich kèn uch waal vertelle det zoeë waal ‘links’ as ‘rechs’ zoeëget mèt de kop door ‘t daak ging wie ich ze vroog. Ich mende zelfs toen al urges ‘n klein träönke van vastelaovesgelök te besjpeure. Veur höbbe toet midde in de nach hel-op gedruimp. Mien adjudante vertrokke mèt ‘ne groeëte sjmile nao hoeës toe. As geur oet de raam höb gekeke (maar waarsjienlik loog geur lekker te sjlaope), mot geur ze höbbe zeen blinke. Veur höbbe al ’n paar waeke de taak óm dit gelök, geheim te haje. Det lök bes aardig, al zegk ich det zellef. Achter de sjerme sjakele veur mèt de PeeKaa nag ’n tendje bie want ’t sezoen is kort en d’r is mieër den det veur verwach hadde wat geregeld mot waere. Veur höbbe dus genog te doon. Dit ieërste daakbook deil is taeves alves ’n saort van ieërste Sinterklaoskedootje van ós veur uch. De res van de kedootjes mótte veur noe rap gaon inpakke. Dus… blief braaf dees daag den kómme de Sint en Piete zeker bie uch langs. Fijne Sinterklaos en toet de volgende kieër,De nieje en zien adjudante