As wat… Zoeë wie ich in ‘t ieërste deil al vertelde, is Vastelaovesprins waere ein van de groeëtste iere die ‘ne miens ten deil kèn valle. Veur haope as trio den ouch op ‘ne fantastische vastelaovend. Sterker nag; veur ós is ‘t allemaol al begós. Väöl vergaderinge, eindeloze app-conversaties en praktische zake zoeëss ‘n motto bedinke, ’n hoesorde ontwerpe, pakke passe en foto’s make. En det pakke passe….. det zal veur ‘n groeët veurdeil gaon zörge, realiseer ich mich noe.. Anger jaore kwaam de ‘as wat geis se verkleid’-vraog bie mich meistal kort veurdet ich örges mós zien pas baove drieve. Den waerde in alle haos de vastelaoveskiste, wao in de loup der jaore ‘n ‘ne haop gerei zoeës pakke, mötse, pruuke en anger prullaria verzameld waas, geäöpend. Ein jaor vónje de muuskes det sjoeëns ouch sjoeën; daorom zien de kartonne doeze inmiddels vervange door z’n plastice Action kiste wao väöl in pas. Veur de mannelikke laezers ónger ós… jao, die besjtaon éch en zien inmiddels oppe Ruiver te kriege op de plek wao ieërs de Albert Heijn loog. Dit jaor den ouch neet ‘t probleem des se ‘smorges wakker waers óm vervolges urges oppe waeg nao dien bed ‘ne berg vasteloaveskleier te vinje vol mèt modder, angere sjpetters en ‘ne geur wao se geur taege zaes. Gevolg… weer opnie mèt diene messjiens waal enigszins zjwaore kop in die kis mótte graaje óm get biejein te sjrape. Ouch de probleme die ich waal ens óngervònj as ich door ‘n combinasie van drank in kaje waersómstandighede de blaos dringend mósde laege, zien dit jaor waarsjienlik as snieje veur ‘n sjmeltend veurjaorszunke verdwene. Nieks ‘n lange rie veur de toilette die oeters langzaam korter waert, óm op ‘t moment des se eindelik bie ‘t urinoir bös aangekómme nag dien vastelaovespak mèt oetdaginge mós äöpene, óm den te ontdekke det de ieërste dröppelkes zich al in de óngerbòks bevinje. Nae, dit jaor gewuuën de gulp van ’t pak äöpene en laot gaon dae wage! Ouch de keuzestress ‘wao gaon veur haer’ zal d’r dit jaor veur ós neet zien. Gaon veur nao de Zoepkoel of sjlaope veur iets langer oet en gaon veur nao de Sjtasiefestasie? Haole veur de letste trein den nag of misse veur dae en motte veur ‘ne taxi belle? Of blieve veur in Offebèk en gaon veur de Ruiver op? Lekker in de tent of in ‘t kefee? Nae, dit jaor is ós programma noe al perfek. ‘t Zit boeëmvol en nao werkelik alles kieke veur oet. Väöl dinger gaon nie zien, althans de manier wao-op veur ze noe mei gaon make. En haopelik gaon veur ze same mèt uch mei make en prooste veur op eindelik weer ‘ne ajerwets gezellige vasteloavend. Gaef ‘t door! De Nieje

Wat as… In dien laeve kómme döks ‘wat-as’ vraoge veurbie. Euver ‘t algemein höb ich dao neet zoeväöl mei. Wat haet ’t namelik veur zin óm nao te dinke was se zous doon, as se väöl geld zous winne? Wieväöl miense oppe Ruiver kriege dao noe mei te make? Die kans is zoeë klein. Op fieësjes kwaam ouch waal ens de ‘wat-as’ vraog: ‘wat zou se doon, as se dich as prins vraoge’ veurbie. Ouch zo’n vraog wao de kans klein van is. En hoewel det gen vraog is wao ich lang biej sjtil bleef sjtaon – ‘ich wil namelik neet per sé in ‘t middelpunt van de belangstelling sjtaon en väöl verplichtingen, det is nieks veur mich – verangerde mien antjwaord in de loup der jaore waal nao ‘wae wet’. Want zègk noe ierlik; binne de vastelaovend is d’r is gen hoeëgere ier den Prins te zien same mèt dien adjudante. ‘n Eige oetkómme, de Prinseresepsie, gruuëts dao baove op diene Prinsewage in de optoch en ‘n emotioneel Windjbuujelsjtrieke op vastelaovesdinsdig. En det zien pas ‘n paar dinger die onvergaetelik gaon zien, höb ich begrepe. Neet veur nieks zien d’r talloze prachtige liedjes euver ‘t Prinssjap gemaak… Dus toen pas, totaal onverwachs, de Prinsekemissie op de stoep sjting om de ‘wat-as Prinsvraog’ te stelle, zei miene kop det ich d’r ‘ne nach euver mós sjlaope maar mien vastelaoveshert had al lang keihel ‘jao’ gesjriewd. Gaef ’t door! De nieje en zien adjudante!