Dit zien de fieësdaag!? December waert ouch waal de maondj van de fieësdaag geneumd. Te beginne mèt Sinterklaos, ‘n prachtig sprookje maar veural leuk as se zelf klein kinjer höbs of d’r ‘ne bös. Den Körs, ‘n fieës gans vol gezelligheid, aete en drinke. En hoewel det natuurlik allemaol leuk is, kump ‘t op mich altied ‘n bietje geforceerd euver. Eigelik sjteit altied alles al vas; ’t gezelsjap, de lokasie, ‘t tiedstip en zelfs ‘t veur-, hauf- en naogerech. Ich bedoel… as se den toevallig bie de Paerssjtal belanjs, is de kans groeët det d’r kaajsjottel mèt ‘n gevuld eike op ‘t menu sjteit. En ouch Aad op Niej is gezellig maar dao mis ich toch net get bie. En zeker aankómmende edisie zal ‘n anger geveul bie mich tewaeg gaon bringe. Want wie ich normaal gesjpraoke op dae 31ste december aaftel nao ‘t nieje jaor, tel ich noe al waeke aaf nao get angers. Geur veult ‘m misschien al aankómme, leef daagbooklezers, ich tel dit jaor mieër den oejts aaf nao de vasteloavend. Det is noe ‘t fieës wao nag ‘n groeëte rol is weggelag veur sjpontaniteit, veur gekkigheid en oet de bandj springe. Doe wets des se geis maar wao en wie se eindigs is de vraog. Hoewel veur dao dit kieër bliekbaar get veurzichtiger mei mótte zien… En eigelik geit det aaftelle nao Aad op Niej bes sjnel. Te beginne mèt de Mansluujzitting (veur de Prinsraojers ónger uch… dök vaste prik veur mich!), daonao de Sjterzitting (veur de Prinsraojers onger uch… dök vaste prik veur mich!) toet uiteraard ‘t knalspektakel van ’t Prinsebal (veur de Prinsraojers onger uch… dök maar neet altied, vaste prik veur mich!) wat dit jaor haopelik weer ‘n geweldig fieës geit waere. En hoewel ich normaal gesjpraoke mèt die daag erg van daag toet daag laef, laef ich noe juus noa dae eine sjpecifieke daag toe. Sterker nag… ‘t dreit óm bienao nieks angers mieër.  Mèt Sinterklaos höb ich gen pepernote en speculaas gekóch, maar lollys en angere verpakte snoepjes. Sjtaond op bed höb ich die toen ‘n uurke lang met ‘ne sierlikke zweij links en recht van mich gegoeid, óngertösse zjweiend nao miense die d’r gaar neet ware. In plaats van Sky Radio of de Top2000 sjteit óm beurte ‘ne Vasteloavesspotify of -YouTube playlist oet de speakers te brulle. En dit jaor haet ózze greune körsbaum ietwat gaele leegskes en roeije slingers. Maar good, det haet d’r eigelik idder jaor… Mien vuurwerkpakket höb ich den waal weer bewus geselecteerd op ‘t in de loch laote sjete van de Limburgse driekleur! Dus ‘t veurgerech, dao zien veur as trio en aanhang al ‘n paar waeke van aan ‘t genete. ‘t haufgerech, daomei sjtarte veur op 4 fibberwarie en det verorbere veur neet in ‘n half uurke maar dao gaon veur ‘n paar waeke euver doon. En de smaak van ‘t naogerech zal veur ieëwig blieve. Det zal de sjmaak zien van al die herinneringe die veur noe nag motte gaon make.  Veur winse uch fijn daag, ‘ne goeie roetsj en bön veurzichtig mèt vuurwerk. Den treffe veur ós vanaaf jannewarie vas waal örges as veurbereiding op de echte fieësdaag! Gaef ‘t door! De nieje

As wat… Zoeë wie ich in ‘t ieërste deil al vertelde, is Vastelaovesprins waere ein van de groeëtste iere die ‘ne miens ten deil kèn valle. Veur haope as trio den ouch op ‘ne fantastische vastelaovend. Sterker nag; veur ós is ‘t allemaol al begós. Väöl vergaderinge, eindeloze app-conversaties en praktische zake zoeëss ‘n motto bedinke, ’n hoesorde ontwerpe, pakke passe en foto’s make. En det pakke passe….. det zal veur ‘n groeët veurdeil gaon zörge, realiseer ich mich noe.. Anger jaore kwaam de ‘as wat geis se verkleid’-vraog bie mich meistal kort veurdet ich örges mós zien pas baove drieve. Den waerde in alle haos de vastelaoveskiste, wao in de loup der jaore ‘n ‘ne haop gerei zoeës pakke, mötse, pruuke en anger prullaria verzameld waas, geäöpend. Ein jaor vónje de muuskes det sjoeëns ouch sjoeën; daorom zien de kartonne doeze inmiddels vervange door z’n plastice Action kiste wao väöl in pas. Veur de mannelikke laezers ónger ós… jao, die besjtaon éch en zien inmiddels oppe Ruiver te kriege op de plek wao ieërs de Albert Heijn loog. Dit jaor den ouch neet ‘t probleem des se ‘smorges wakker waers óm vervolges urges oppe waeg nao dien bed ‘ne berg vasteloaveskleier te vinje vol mèt modder, angere sjpetters en ‘ne geur wao se geur taege zaes. Gevolg… weer opnie mèt diene messjiens waal enigszins zjwaore kop in die kis mótte graaje óm get biejein te sjrape. Ouch de probleme die ich waal ens óngervònj as ich door ‘n combinasie van drank in kaje waersómstandighede de blaos dringend mósde laege, zien dit jaor waarsjienlik as snieje veur ‘n sjmeltend veurjaorszunke verdwene. Nieks ‘n lange rie veur de toilette die oeters langzaam korter waert, óm op ‘t moment des se eindelik bie ‘t urinoir bös aangekómme nag dien vastelaovespak mèt oetdaginge mós äöpene, óm den te ontdekke det de ieërste dröppelkes zich al in de óngerbòks bevinje. Nae, dit jaor gewuuën de gulp van ’t pak äöpene en laot gaon dae wage! Ouch de keuzestress ‘wao gaon veur haer’ zal d’r dit jaor veur ós neet zien. Gaon veur nao de Zoepkoel of sjlaope veur iets langer oet en gaon veur nao de Sjtasiefestasie? Haole veur de letste trein den nag of misse veur dae en motte veur ‘ne taxi belle? Of blieve veur in Offebèk en gaon veur de Ruiver op? Lekker in de tent of in ‘t kefee? Nae, dit jaor is ós programma noe al perfek. ‘t Zit boeëmvol en nao werkelik alles kieke veur oet. Väöl dinger gaon nie zien, althans de manier wao-op veur ze noe mei gaon make. En haopelik gaon veur ze same mèt uch mei make en prooste veur op eindelik weer ‘ne ajerwets gezellige vasteloavend. Gaef ‘t door! De Nieje