Gaef ’t door! Zoeë as ózze Hoeëgheid-elect al zei, moge veur, as linker en rechter, dit daagbookdeil veur ós raekening nimme. Ouch veur gaeve ’t gaer door dus veur wille zeker de fanatieke Prinsraojers ’n deens bewieze! Veur zalle uch den ouch in dit deil get euver ós zelf gaon vertelle, in de haop det geur dao mesjiens get wiezer van waert! ’t Moog veur zich sjpraeke det vanaaf ’t moment det de Nieje ós gevraog haet, veur net zo hel sjtaon te popele óm op 4 fibberwarie in ‘ne volle zaal teveursjien te moge kómme. Bie ós sjteit al kontinu de Vastelaovespleejlis op repeat, of det noe thoes in ’t Windjbuujelrieëk of op ’t werk is. Ós kollega’s höbbe zich dink ich al dökker aafgevraog of d’r get mis is bie ós in dae baovekamer. Maar veuralsnag löp ’t wie gesjmaerd en haet nemes get in de gate! Langzaam maar zeker zien de ieërste vastelaoves-evenemente weer achter de rök en ’t is den ouch gaaf óm te zeen det d’r al twieje hoeëghede bekend zien. Vanaaf dees plek wille veur – ouch names de Nieje – Hoeëgheid Jeugprins Sjors III mèt zien adjudante Mees en Loek felisitere met häör beneuming toet jeugtrio van de Windjbuujels! Wat ’n te gek trio; veur weite zeker det veur same mèt uch ‘ne fantastische tieëd gaon belaeve. Netuurlijk felistere veur ouch Bacchus Dirk I mèt zien beneuming toet dorslustige Hoeëgheid. ‘ne Fantastische groep höb se óm dich haer, geur maak zeker get Ruiverse en Offebekse kasteleins blie! Veur gaon d’r ’t kómmende sezoen zeker ’n paar prooste mèt elkaar. Allein hadde veur ouch al gezeen det geur alweer op get oet ziet, wat neet van uch is! Mesjiens det uch det noe lök, maar nao 4 fibberwarie geit det netuurlijk neet mieër gebeure! Truuk nao die fanatieke Prinsraojers: veur wille ós gaer vas ’n klein bietje veursjtelle aan alle Windjbuujels en Windjbuujelinnekes. Veur zien echte Windjbuujels maar veur höbbe neet ós ganse laeve in ’t Windjbuujelrieëk gewoeënd. Oeteindelijk bliek den des se ’t Ruiverse teväöl mis en altied weer truuk kumps. Det prooste mèt de Bacchus doon we trouwes ’t leefste mèt ein (of inkele) glaze beer. Det is ós beide vanoet ’t verleje ouch waal mèt de paplaepel ingegaote. Net as de leefde veur de vastelaovend euveriges. Dae höbbe veur al door gans Limburg gevierd maar hie geldt wederom: ’t leefs houw se toch oppe Ruiver op die kis. Euver die kis gesjpraoke: Sjiek óm alle #gaeftdoor filmkes te zeen. Geweldig det de vastelaovend zoeë laef oppe Ruiver. Ech sjiek! Veur wille zeker idderein aansjpaore óm te raoje en óm mèt dien biedrage de Kinjeroptochkemissie te sjteune. Moch se dit nag neet gedaon höbbe, den gangk nao ein van de Ruiverse of Offebekse kefees en duuj dao ’n viltje in ’t kisje mèt uche eige naam, dien eige motto en netuurlik de naam van ‘de nieje’, en scan as se wils de QR-code veur ’n donasie aan de Kinjeroptoch! Veur noe zien veur waal weer effe klaor. Veur haope de ‘usual suspects’ van ’t Prinsraoj-sjpel van get broekbare input te höbbe kènne veurzeen. En mog geur nag vraoge höbbe veur ózze nieje Hoeëgheid, kènt geur die altied sjtelle op Facebook of Instagram. Wae wet kump d’r dao nag op truuk. Veur zeen ós sjnel; wellich kómmend weekend oppe Buute-aovend, Sjterzitting of Kinjerzitting! Wat veur zoeë links en rechs huuëre, belaof det weer ’n grandioos weekend te waere. Dus koup die letste kaarte en geneet van alles wat d’r sjteit te gebeure! Vastelaovend same!‘de linker’ en ‘de rechter’
Sjtum DEH! nao de finale van ’t LVK
https://youtu.be/Reeps2kA45EZoeë wie bekènd, sjtaon de men van Deh! in de halve finale van ‘t LVK, mèt häöre sjlaeger Veur blieve hiej! Dees halve finale waert kommende vriedaag tösse 18 en 20 oeër, en zaoterdaag tösse 10 en 12 oeër oetgezonje op L1 tv. De halve finale bereike is natuurlik sjoeën, maar ’t zou natuurlik nag sjónder zien as de Ruiver weer oppe bühne sjteit in de groeëte finale! Óm det te bereike haet Deh! dien hulp nuuedig. ’t volk van Limburg bapaolt welke 20 liedjes doorgaon nao de finale. ’t volk van Limburg, det bös doe dus ouch!Wie kèns se helpe? ’n half oeër nao de oetzendinge, kèn door idderein via SMS gesjtump waere op zien favoriete liedje (en veur Windjbuujels is det natuurlik Veur blieve hiej!). SMS dus op vriedaag 20 jannewari tösse 20 en 20.30 oeër, en op zaoterdaag 21 jannewari tösse 12 en 12.30 oeër, ’t berich: LVK 31 (dus houfletters LVK spatie 31), nao nummer 4004. As iddere Windjbuujel “LVK 31” SMS, is det ‘nne goeie duuj in de rögk richting finale. As iddere Windjbuujel en zien femilie, bure, collega’s, vrunj, Drake, Belhamels en Hopsjlokkers duit sjtumme op LVK 31, den geit ’t hel! En wae wèt, sjteit de Ruiver sjtrakkes op 3 februari in de LVK finale!
Insjrieve kinjeroptoch
— DOE DUIS TOCH OUCH MÈT! — Op zóndig 19 fibberwarie trèk ózze Kinjeroptoch weer door ’t dörp.Höb geur al ein good idee? Ziet geur missjien al bezig mèt knutsele?Of höb geur nog ein lètste zetje nuuedig om mèt te doon? Idder jaor is ’tweer keigezellig en as det nog neet alles is, zien der ouch nagprachtige prieze te winne.Haaj ós socials in de gate veur ’t lètste niets. Dus: MÈTDOON, en toet binnekort! De Kinjeroptochcommissie Mieër info & insjrieve: https://windjbuujels.nl/evenementen/kinjeroptoch/
Oetsjlaag veiling
De veiling is aafgelaupe en dèt beteikent dèt mannen van de raod van 11 en de vórs neet mieeër allein hoove te zitte op de bühne tiedes de Buutteaovend en Sjterzitting.De oetsjlaag van de veiling:Buutteaovend:Sjtool 1: Bacchus Dirk ISjtool 2: Bacchant 1Sjtool 3: Bacchant 2Sjterzitting:Sjtool 1: Anja JanssenSjtool 2: Gast 1Sjtool 3: Gast 2Hartstikke bedank veur ’t beeje en daomei de biedrage aan ’t Nol Wassen fonds.Veur kieke oet nao de Buutteaovend en Sjterzitting en haope uch dao te zeen.D’r zien nog ’n paar kaertjes veur beide aovend te kriege, dus bön sjnel!Koup uch kaertjes via https://www.windjbuujels.nl/etickets
Jeugprins Sjors (Clerx) III
Dao is d’r den, de nieje hoeëgheid van Windjbuujels’ Jeug. PRINS SJORS III 🎉 Same mèt zien adjudante Mees en Loek geit hae d’r dit jaor ‘ne knallende vastelaovend van make! 💥 Gènne flauwekul, versjtandj op nul! 💥
Veiling Buutteaovend & Sjterzitting
Op 4 fibberwarie zal VV de Windjbuujels weer ’n niej trio oet laote komme. Maar toet dae tied doon veur ’t nog efkes zonger. Det beteikent det der plaatse vrie zien op de bühne met de Buutteaovend 20 Jannewarie en de Sjterzitting 21 Jannewarie, namelik 3 plaatsen per aovend. Höb geur noe altied al ens sjtiekem gedach van “Dao zou ig noe bes waal ‘ne kier wille zitte”? Dèn is dit uch kans!!!!!!! Laes verder en beej op dees plaatse: https://www.windjbuujels.nl/veiling #vvdewindjbuujels #windjbuujels #vastelaovend #opperuiver #reuver #limburg #gaeftdoor #thema #zittinge #buutteaovend #sjterzitting #veiling #sjtool Nao de veiling
Kinjerzitting
Zondig 22 Jannewarie is ’t weer tied veur de kinjerzitting in De Sjakel. Windjbuujels Jeug prizzenteert veur uch ’n sjoeën programma wao d’r flink gezonge, gespronge en gedans zal waere. Kom ouch verkleid nao de zitting, entree is gratis! ’t programma sjtart om 14.30 oer.
DAAGBOOKDEIL 4 VAN DE NIEJE
Leef Windjbuujels en Windjbuujelinnekes, ‘t nieje jaor is noe ech weer begós; ‘ne frisse sjtart wao-in d’r haopelik ‘n haup probleme die de waereld de aafgeloupe jaore in zien greep gehaje höbbe, opgelos zien of sjnel gaon waere. Netuurlik wil ich uch via deze waeg, ouch names mien adjudante en aanhang, ’n magnefiek roeëd-gael-greun en gezondj niej jaor winse.
Daagbookdeil 1 van ’t boeregezelsjap
Hie un berich vanoet ’t nieje boeregezelsjap: Leef miense, Daor sjtinge ze, gehieël ónverwach, op ‘ne zónnige morge in november bie ós aan de deur mét twieë heudjes in de henj. De vraog waerde gesjteld of veur kómmend jaor boerebroedspaar wólle waere. Hie hoofde veur neet lang euver nao te dinke. JAO, dét wille veur same hiel gaer gaon belaeve!!! Vanaaf det moment kós de veurpret beginne. Dao ginge veur den mèt de karboet en sjroebelaer in de tas op waeg nao de (aansjtaonde) getuge, ouch die zagte volledig euvertuug JAO. De res van ‘t gezelsjap waerde vervolges ouch gevraog. Wie sjoeën is ‘t óm same mèt ós kammeräöj ‘t boeregezelsjap van 2023 te moge waere! Same ‘t groeëte geheim beware, ós treffe zónger det angere det in de gate höbbe, de sjtiekemme knipuigskes, det Zalle veur neet sjnel mier vergaete. ‘t Aaftelle kèn langzaam aan beginne….de maondje waere al waeke…. Veur höbbe d’r óntzèttend väöl zin in!!! Alvas eine joeksige groet van ‘t nieje boerebroedspaar ❤️💛💚 PS: zet 11 februari en 21 februari alvas in uche agenda, veur verdere info haaj daes pagina good in de gaate. 🥂🎉 Mier info
V.V. De Windjbuujels en Boerebroelof Ruiver-Óffebèk sjlaon in 2023 same ‘nne nieje waeg in.
Windjbuujelinnekes en Windjbuujels, Boere en Boerinne, De tradisie van de Boerebroelof besjteit oet ‘t in de onéch verbinje van ‘n broed en ‘n broedegóm op vastelaovesdinsdig. Gén baetere symboliek van ‘t huwelik pas bie de waeg dae V.V. De Windjbuujels en Boerebroelof Ruiver-Óffebèk in ‘t nieje jaor same insjlaon. Vastelaovesvereiniging De Windjbuujels en Boerebroelof Ruiver-Óffebèk gaon vanaaf 1 jannewarie 2023 same verder as ein vastelaovesvereiniging ónger de vlag en naam van V.V. De Windjbuujels. De Boerebroelof in Óffebèk ként ‘n lange en rieke historie vanaaf 1963, wie op eine aaijerwetse kaaije aovend buurtbesjtuurders van Óffebèk same bie-ein kwame in Kefee Kinjer Killaars óm ein Broelofsvereiniging op te richte. Op 26 fibberwarie 1963 waas ’t zoe wieët en haaj Óffebèk zien Boerebroelof. As ierste Boerebroedspaar kwame Frits en Nel Boonen-Franssen onger de hood oet ónger de klanke van “Óffebèk blief Óffebèk”. Mer leefs 57 broedspare volgde dees tradisie. Ut besjtuur van de Boerebroelof en van V.V. De Windjbuujels is d’r vuel aan gelaege om dees vastelaovestradisie in sjtandj te haje en door te gaeve aan de volgende generaties. Veurzitter van de Boerebroelof Andy van Helden: “Det kén ‘t beste door noë de hénj in elkaar te sjlaon en as ein vereiniging de oetdagingen aan te gaon om de Ruiverse en Óffebèkse vastelaovend toekomstbesjtendig te haje.” De Boerebroelof behild zien identiteit en veur zette de activiteite veurt zoë wie ze al jaore oppe vastelaoveskalender sjtaon, same met de miense die de aafgelaupe jaore de kér getrokke höbbe, aldus Roy Linssen, veurzitter van De Windjbuujels. De Boerebroelof wuurd as kemissie opgenaome in de sjtructuur van ós vastelaovesvereiniging. Binnekort vindj geur alle vertroëwde informasie euver de boerebroelof op www.windjbuujels.nl en volgt geur de Boerebroelof via de social media kanalen van De Windjbuujels. Met ingang van 1 jannewarie 2023 hilt de Boerebroelof Ruiver-Óffebèk op te besjtaon as zelfstandige vereiniging. Ut 59e Boerebroedspaar kump op 11 fibberwarie 2023 oet tiedes ut Boerebal in Kefee-zalen De Paerssjtal. Ónger ut motto: “Gaef ‘t door” Besjtuur Boerebroelof Ruiver-ÓffebèkBesjtuur Vastelaovesvereiniging De Windjbuujels