Leef Windjbuujels en Windjbuujellinnekes. De 31e kump sjteeds dichterbiej, de sjpanning is om te sjnieje, de foto’s zien geknip en de sjteeke zitte wie gegaote. Veur kenne neet wachte om ós aan uch bekend te mooge make. Ich höb begreepe det de bühnekemmissie keihel aan de sjlaag is om get sjieks  te make wat aansjluut biej ‘t thema. Maar ’t waert ein race taege de klok om alles op tied klaor te kriege. Ich bön ontzettend beniejd wat se d’r van gemaak höbbe. Hieëre ónger ós: höb geur det ouch geveuld tiedes de mansluujzitting? De vastelaovessfeer hing al good in de lóch! Veur höbbe alvas kenne veurpreuve! De stjerzittinge mooge veur natuurlijk neet vergaete! Vanoet alle heuk van ’t Windjbuujelriek kós se zeen det ‘t daak d’r aaf ging! Chapeau weer veur de organisatie dit jaor! En det in dezelfde dampende Sjakel as wao ich mich moog gaon veursjtelle aan uch! Niejsjierig gemaak door de veurzitter, bön ich geliek nao de Bruna gerend om ein van die sjoeëne creaties van de knutselkemmissie te bemachtige. ’t Helt neet op! Kómmend wiekend sjteit ’t boerebal op de planning. Ich bön dit jaor extra beniejd waem dao ónger dae hood oet moog kroëpe! Veur zalle ‘t dit jaor toch net get angers belaeve as anger jaore. Maar veur det ‘t zoëwiët is gaon ós huidige broedspaar Jeroen en Ellen en ós minimoos Cas en Saar nog iërs in de onech sjeije…Helaas weer ’n boere huwelijk wat neet is blieve plekke…  Maar ‘t nieje broedspaar sjteit natuurlijk ouch te popele om zich aan uch veur te sjtelle aankómmende zaoterdig. Zeen veur ós den? Miene veurganger Prins Ralph I zal aansjtaonde zondig gaon aaftraeje! Ralph bedank veur ’n fantastisch jaor en ’t wermhaaje van de mantjel. ’t Is ein groeëte iër om van dich de scepter euver te mooge nimme. Ich zal mien oeterste bès doon om aafgelaupe jaor te evenare! Jeugprins Tjen l, van herte proficiat! Veur gaon d’r same ‘ne onvergaetelijke vastelaovend van make! Ich ken neet wachte om same op de bühne te sjtaon en met de scepter te zweije! Bacchus Guus l en zien bacchusklöp, van herte proficiat met uch bacchussjap. Veur gaon d’r deze vastelaovend zeker ‘n paar drinke same (en messjien ‘n beginners atje). Auch is de Drake Prins van ós buure in Beesel inmiddels oetgeroope. Prins Jeroen II, ‘ne dieke proficiat veur dich en dien adjudante Sten en Ferd. Maak d’r get sjoeëns van en wae wet, zeen veur ós nog! Veur mótte, wie lastig auch, nog hiel efkes geduld höbbe veur det veur ós bekend mooge maken. Veur mich en mien adjudante ken de tied neet sjnel genóg gaon! Ps, höb geur al gesjtump veur t prinsraoje? Veur gaon de 31e jannewarie zeen waem ‘ne pries geit winne. Groetjes De nieje Windjbuujelprins 2026

Beste Windjbuujels en Windjbuujelinnekes, Eindelijk zien veur aan de beurt om get van ós te laote huure naodet ózze nuuje Hoeëgheid al 3 sjieke verhaole haet mooge sjrieve. Veur hadde dit noeits aan zeen kómme. Veur kreege de vraog óm ‘n pilske te kómme drinke. Al sjnel krege veur ‘n pilske veur de naas gezatte mèt de vraog of veur deze vastelaovend zien adjudante wolle zien en dao zagte veur natuurlijk volmondig JAO op! De veurbereidinge koste beginnen, kop maete, pakke passe ,sjoon koupe en ‘ne sjieke jas mog neet ontbraeke. De fieësdaag zitte d’r weer op, maar de echte fieësdaag beginne veur ós pas mèt de vastelaovend want det is d’r mèt de paplaepel ingegaote. Toet dae tied haaje veur ós gedeisd en den zeen veur ós de 31ste jannewarie in de Sjakel!! Doe bös d’r toch aug biej??? Groetjes, De linkse en de rechse van de nieje…

Leef Windjbuujels en Windjbuujellinnekes, De körsdaag sjtaon weer veur de deur, ’t ganse dörp is in volle veurbereiding, ‘t zuut d’r euveral erg gezellig oet. Ouch ich bön mich aan ‘t veurbereide op dees daag om gezellig same te zien en good te aete. De veurbereidinge veur de 31ste jannewari blieve ouch doorgaon, de sjoon waere ingelaupe en opgepoetst, de haemde gesjtreeke en ’t sjtrikske fijn in de ploei gezatte. Aafgelaupe waek kreege de wagebouwers van ós Windjbuujelriek good niejs, de gemeinte haet namelik besjlaote óm de koste van de verzekeringe te SJPONSere. Ich haop det ze allemaol get sjieks bouwen. En det veur ouch dit jaor weer ‘ne fantastische optoch mooge höbbe.  Aan de liedjes zal ’t zeker neet ligge, veur höbbe namelik neet ein mer twieë halve finaliste die Ruiver gaon vertaegewoordige op ‘t LVK. Ich wins de veterane van Revoc/VCB en de AJO hieël vuuël succes en plezeer. Zet ‘m op! Veur gaon zeker sjtumme, geur ouch?  Höb geur ‘t nieje book euver Lars en Dirk, die mèt doon aan de kinjeroptóch, al gelaeze? Moch det neet ‘t geval zien, den kènt geur nog sjnel langs de Bruna veur nog ‘n last minute körskedo veur ónger de baum. Leuk óm veur te laeze aan de potentiële toekomstige optochfanatiekelinge.  Veur noe gaon ich mich weer veurbereide op de körsdaag en alles wat hie bie kump kieke, want dae knieën in ‘t zoër maak zich zelf neet klaor. As die daag achter de rök zien is ’t namelik nog mer eine maondj veur det ‘t zoeë wiejt is. Ich kèn neet wachte óm mich de 31ste jannewarie aan uch veur te sjtelle. Zeen veur ós den? Mien adjudante en ich winse uch fijne körsdaag en ‘nne goeije roetsj (kiëk oet veur de vingers). Veur zeen ós in 2026!!! Groetjes, De nieje