Windjbuujels & Windjbuujelinnekes, Aanstaonde maondig 3 Mieërt trek de groeëte optoch weer door ’t Windjbuujelriek. Opsjtèlle vanaaf: 12.30 oer oppe Keulsewaeg, vanaaf kruutsing Beukelsjtraot, richting de grens, waobie de nr.1 achteraan sjteit. Deilnimmers kenne tösse 12.30 oer en 13.15 oer bie Keulsewaeg 108 langs loupe veur de ieërste jury keuring. Daonao kènne de deilnimmers nao häör opstelplaats gaon, de sjtartnummers staon aangegaeve oppe waeg. Vertrèk: 13:30 oer via de Keulsewaeg, Riekswaeg nao de Mert Oppe Ruiver. Oppe mert is de óntbinjing mèt aansjloetend priesoetreiking en boetesjpektakel mèt Rempetemp! Veur aanwoeënende: parkeer de auto astebleef neet aan de waegkantj. Opsjtèlling:1 Yvon met de bakfiets – Windjbuujelcup2 Fluitermenie3 Speng Tröag – Wi(e) FI(e)4 PSW – Veur laupe neet in ôs eend(t)je5 Frits en Jesse – Hebben Gemepte petatte6 De Vastelaoveskriebels – Achteróm is kermis, veuróm is après ski7 Vastelaovesmaedjes van toen – Beste maatjes zitte aan 1 vas!8 Café Poels – De Ker…mis9 EPS – Aaje Glorie Eks Prinse Societeit10 Boetsauto’s – Knalluh maar11 Joekskapel Sjteets baeter12 Biejeingeraap – Biej wae moge veur achteròm? Fieëste wie de Bieëste!13 Jeugprinses Romay I en adjudante Guusje en Fiene14 De Bóntje Kliek – Ózze ker-mis nog knappe wagebouwers15 VVV-fanclub – Grieëp dien kans!16 PiGePeJoHeKa – (B)ezel Bedank17 Geiteleike – De Poes trekke.18 Jeugboerebroedspaar Cas & Saar19 Boerebroedspaar Jeroen & Ellen20 De daaaartclub + fans – Vogel sjpotte21 Moeketoos – Wat ‘ne Kermis det Draaksjtaeke22 Harry’s Angels – Veur zien Nonbienaer.23 De Rups – Dreije dreije24 Prins Daan II van Jong Nederland Ruiver – Offebek25 De Blomegroep – Op henj gedrage…….Jippie!26 Joekskapel de Dorsvlaegels27 Sjpass – Achteróm is (ker)mis28 De Jimmie – Doot nog maar ’n rundje29 Twiëje halve is aug eine ganse – Veur hubbe kermis zat toes!30 Marjon & Wim – Veur kenne neet same door ein deur31 Mamma Mia – Veur zien de leechpuntjes van de optoch32 Hie zien v’r den – Ozze kermis is fout maar goud!33 Leon en jack – 50% korting34 Heksen kwadraat – Veur sien ein paar biejein gevaegde hekse35 Bacchusklup Ruiver – Bacchus Baek I36 Eendjes vange – Winnen, winnen, winnen37 De zoete zusjes – De zeute inval38 Beer en Teer – Veur sjeete raak39 Sjponsorwage Wassink auto – Veur keure noe nieks aaf!40 De Kermisklante – Goodgekeurd41 Hoeëgheid Prins Ralph I en adjudante Hans en Leon
Verkoup magazine De Windjbuujel
Leef Windjbuujelinnekes en Windjbuujels, Morge sjteit de verkoup van ós vastelaovesmagazine De Windjbuujel, mèt dao in alle Hoeëgheje van ‘t Windjbuujelriek en sjmeuïg vastelaovesniejs. Dit alles prachtig vormgegaeve mèt vuuel foto’s. Vanaaf 10.00 oer zal ós magazine hoes aan hoes waere aangebaoje. Bie aankoup van ‘n magazine krieg geur ‘ne gratis poster van ózze nieje Hoeëgheid Prins Ralph I.Wilt geur meihelpe mèt verkoupe sjtuur den ’n berich nao redaksie@windjbuujels.nl! Deile moog, meihelpe is nag fijner! Veur kènne helaas neet idder adres Oppe Ruiver en in Óffebèk aandaon dus móch geur neet in de gelaegeheid zien gewaes óm ’t magazine te koupe, den kènt geur vanaaf zaoterdigmiddig terech bie de Bruna Reuver .
Prins Ralph I
Deze vastelaovend wuurd in ut Windjbuujelrieëk nieks aafgekeurd! Hoegheid prins Ralph I en adjudanten Hans en Leon oetgeroope! Ruiver 15 fibruari, Achteróm is Kermis, t thema van dit jaor waas gans doorgeveurd in os Grand-Café de Schakel. Met daobiej ein sjpeciale dank aan os decor-kemmissie en de gashieër daovan, Timaro. In dae Sjakel waerde de nieje hoegheid geprizzenteerd door de Windjbuujels. Idderein dae binnekwaam rook de popcorn lòch, de prieze ware oetgesjtald en de Kop van Jut haaj ein prominente plaats op ut podium. De zaal waas door DJ Sjors lekker opgewermp met sjoeëne vastelaoves klanke. Rondj de klok van 11 op 9 brook ut moment suprème aan. Vors Jeroen noom ut spraekiezer in de handj en startte same met de sikretaris van de Windjbuujels en de griffier van de EPS de laoteriej om te bepaole welke Windjbuujels en Windjbuujelinnekes ein poging moagte doon om in de prieze te valle. Pas biej de 8ste poging waas ut raak en kos, nao ein aantal troostprieze, toch de haufpries waere oetgereikt. Eine prachtige laevesgroeëte actieheldj, bleek toch ein angere verrassing. De zaal keek vol verwachting toe, wie dao geprizzenteerd waerde; Ralph Engbrocks, hae haet dit jaor de ieër om as Prins Ralph I de Windjbuujels veur te gaon. Naodet de prins waas geprizzenteerd waerde auch sjnel dudelik waem aan zien linker- en rechter kant komme te staon. Hans Boonen en Leon Smolenaars, gaon dit seizoen meij veurop. Met ein sjiek kostuum, keurige sjtrikskes en auch dit jaor weer de prachtige sjteeke van Versierhoes van der Veer, sting dr ein sjoeën plaetje op de bühne! Met ein muzikaal optraeje van fieësbend Stout, waerde de zaal door dit energieke trio veurgegaon in ein fantastisch Prinsebal. Met t motto, ‘veur keure noe nieks aaf!. Dit motto maakt waal dudelik det idderein dit jaor meij geit viere, want in weinig sjtappe haet vriejwaal idderein in ut Windjbuujelrieëk waal ein konnektie met dit nieje trio. Ralph is getrouwd met zien Kim en vader van twiej dochters, Jolijn en Fleur. In ut dageliks laeve is Ralph as keurmeister actief biej de veiling ZON in Venlo. In ut vereinigingslaeve is hae onger mieër zeer actief biej Jong Nederland Offebèk wao dr jaorliks de kampleiding meij verzorgd. En auch biej de volleybalklôp Reovc/VCB wille ze de hoegheid neet gaer misse, zoewel as sjpeler biej de veteranen, en zeker auch as trainer/kootsj biej dames 2. Adjudant Hans (eks-prins Hans) is getrouwd met Lianne en same zien ze de gruütse elders van Gijs en Stijn. Hans werkt aevenens in ut Jocus-rieëk, mer den as ambtenaar biej de gemeinte. Jaorelang waas Hans as Vors de sjtum van de Windjbuujels en auch actief in ut bestuur. Inkele jaore geleeje deej dr dao ein stepke truuk en kreeg daodoor ruumte om vanaaf dit jaor de rol van griffier biej de Eks Prinse Sociëteit op te pakke. Auch Hans is actief biej Jong Nederland Offebèk en in ut seizoen maakt dr gaer zien waekelikse rundje op de wielrenfiets. Aan de angere kantj steit adjudant Leon (eks-prins Leon), dae same is met zien Yvonne. Als medewerker biej Jalema en haufredacteur van Puik is dr auch vanoet zien beroep ein bekend gezicht oppe Ruiver. Daonaeve trapt dr nog altied gaer taege ein belke aan biej de veterane van de Ruiver. Sinds aafgelaupe jaor haet dr ut stekske as praeses van de EPS euvergedrage aan eks-prins Roel en daodoor is dr dit jaor netuurlik alle ruumte om in ut Windjbuujel trio meij veurop te gaon in deze vastelaovend. Gaer zeen veur uch, Windjbuujels en Windjbuujelinnekes truuk op vastelaoves zondig 2 mieërt in de Sjakel veur de prinserecpetie. Of netuurlik biej ein van die angere activiteite die al vanaaf noe oppe agenda sjtaon. En det alles onger ut motto: veur keure noe nieks aaf!
Daagbook van de nieje – Deil 7
Dit is ’t letste DB van de nieje. Veur ’t ieërs in de geschiedenis sjprik de nieje uch persuuënlik in ’n audio-berich toe. Det is sjpeciaal. Leef vastelaovesvrunj…. toet vanaovend! Deure aope óm: 20.00 oerEntree: €5,- (incl. garderobe en kermisversnapering)Band: StoutDJ: Sjors Verkoelenhttps://www.youtube.com/watch?v=rwRNPi9rhls
Opgaeve kinjeroptoch
Boerebroedspaar Jeroen & Ellen
Hiel erg gruuets prizzenteert de Boerebroelof Ruiver-Óffebèk ug häör nieje Boerebroedspaar. Tiedes de kómmende Vastelaovend gaon Jeroen en Ellen Jansen as Boerebroedspaar 2025 same met häör getuge Frank en Annechien Peeters en Ricardo en Jill Pubben d’r ’n groeët fieës van make in ‘t Windjbuujelriek. In ‘ne boemvolle Paerssjtal zörgde ze veur ’n waar sjpektakel en prizzenteerde ós ’n geweldig boeregezelsjap. Bie deze nuuedige Jeroen en Ellen ug alvas oet veur de Boerebroelof op vastelaovesdinsdig 4 Mieërt wao ze door häöre ambtenaar van de börgerlikke standj in de ónèch waere verbónje.
Jeugboerebroedspaar Cas & Saar
Hiel erg gruuets prizzenteert Boerebroelof Ruiver-Óffebèk uch häör nieje Jeug-Boerebroedspaar. Tiedens de kómmende Vastelaovend gaon Cas Boonen en Saar van de Beucken as Jeug-Boerebroedspaar 2025 same mèt häör getuuge Boaz Janssen en Meijs Verlinden d’r ’n groeët fieës van make in ‘t Windjbuujelriek. In ‘ne aafgelaaje Paerssjtal kwame zie ónger de hoeëge hood oet en maakte d’r mèt ‘t aanwezige publiek ’n knalfieës van. Óm 21:30 oer zal ouch ‘t groeëte Broedspaar live ónger de hood oetkómme! Bie deze nuuedige Cas en Saar uch alvas oet veur de Boerebroelof op vastelaovesdinsdig 4 Mieërt wao ze same ’n vrunjsjapsgelofte aaf zalle sjloete.
Boerebroedspaar – Daagbookdeil 5
Zoeë, leef Windjbuujels en Windjbuujelinnekes, Boere en Boerinne, oppe valreep nog `n letste sjtökske van `t nieje Broedspaar zelf. Veur meinde uch toch nog get te motte meigaeve zoeë vlak veur `t Bal der Balle, `t Hoeëgtepunt van `t jaor, Ós eige Boerebal bie Harrie in de Pearssjtal. Mer veurdet veur wieër gaon wille veur gaer de ierste nieje hoeëgheden van de Vastelaovend van 2025 felicitere, alleriers uiteraard Jeugd Prinses Romay 1 mèt häör Adjudante(s) (of maak nieks oet…) Guusje en Fiene, mer ouch `ne dieke proficiat aan de God van de Drank, Beste klant van Salut en Hofkelner van Luxor, Bacchus Beak 1. Veur kieke d`r nao oet óm same mèt Uch, en al die angere nieje Hoeëgheden wat nog zitte te poppele óm zich te prizzentere d`r ‘ne super sjieke Vastelaovend van te gaon make! Ouch `n dieke proficiat aan de kemissies van de Dames/Hieërezitting, en de Joekskemissie mèt haör mier as gesjlaagde zittinge. Wat höbbe veur `n plezeer gehad, neet allein mèt de buutte en angere artieste, mer ouch mèt al die meisterveurspellers die meine `t dit jaor waal good te höbbe… Man man man wat ‘ne kal huurse den veurbie kómme, en ech sjiek óm te zeen wie men alles in de gate helt. Mer ierlik is ierlik, meij en den kómme ze toch aardig doeën bie, en krege veur t behuurlik werm ónger de veut… Blie zien veur den ouch det veur ós geheim nao al dae tied mèt idderein kènne deile, `t heat noe langzat geduurd. Veur zien d`r mieër as klaor veur dus laot `t fieës mer beginne. Ós ganse Boerefemilie sjteit te springe en kèn ouch nimmer wachte, de getuuges höbbe alles in kanne en kruike, die glip d`r nieks tösse oet, Ózze Börgemeister (eine van die 29…) sjteit al weake veur de sjpeegel zien tekste te oefenen, de Ambtenaer sjrief alike lappe teks, tösse al det koffie drinke door uiteraard. Ózze Sirremoniemeister heat `t program al gans in zien köpke zitte, en heat al `n strakke planning gemaak. De Centefoekser heat de ierste pieke al binne, en bewaak die mèt hert en zeel. En zelfs ós Veldwachters zien d`r klaor veur, die höbbe de optocht route al 3 kier op en neer geloupe, de kruuijewiever höbbe de sjnaps al kaad sjtaon. En den sjpele d`r oppe achtergrondj nog tal van boere en boerinne `n fantastische rol óm veur vanaovend en de res van die sjoën daag die kómme gaon alle puntjes oppe “i” te kriege. Wat `n sjoeën club! Noe is `t inkel nog zaak det veur morge zelf de lètste details glad sjtrieke, de boerderie aan kantj make, die mot d`r toch `n bietje praoper bie ligge mèt die daag, ós kleier bie de sjtoumeriej ophaole, de roeije zakdook vas in de tes duuje, doot geur det trouwens ouch? De naegelkes lakke en knippe, en de zjwarte rendjes wegpoetse, sjaere, de sjoon boene, en `ne goeie baom ligke veur vanaovend. Macaroni eate mèt `ne leapel is ózze favoriet veur zo`n aovende. Mèt gezonje sjpanning kieke veur oet nao `ne super sjieke aovend mèt ós ganse Boerefemilie, en al die luuj in de zaal bie Harrie. As lètste wille veur ouch `t Minimoos nog hiël vuul succes winse mèt de lètste veurbereidinge, geniet van uch moment, en as geur uch morge höb mooge prizzentere zeen veur ós gauw genog daonao, veur kieke d`r in ilk geval nao oet. Toet morge allemaol, `T Boerebroedspaar 2025
Boerebal
Angers den veurgaonde jaore zal ’t Boerebal dit jaor ’n waek veur ’t Prinsebal plaatsvinje en waal op zaoterdag 8 fibberwarie bie café-zalen de Paerssjtal. De Kemissie Boerebroelof Ruiver – Óffebèk nuuëdig alle Windjbuujels en Windjbuujelinnekes oet óm in häör beste boere-outfit ’t Jeugdboerebroedspaar en ’t Boerebroedspaar 2025 mèt häör gezelsjap te verwelkómme. Vanaaf 18:30 oer zal de zaal geäöpend zien veur ’t publiek, óm 19:30 oer zal de hoed onthulle waem same mèt de angere jeugdhoeëgheden de jeugd-vastelaovend zal veurgaon. ’t publiek kèn tösse de bedrieve door genieten van muziek van de Ruiverse (Jeugd) sjlaegers en Joekskapel de Gresbuus. Rondj de klok van 21:30 oer zal eindelik bekend waere gemaak waem ’t nieje Boerebroedspaar is en waem ’t Boeregezelschap 2025 zal zien. Aansjloetend zal vastelaoves-band Richtig Spiét d’r ’n knalfeest van make wao nog lang euver zal waere naogepraot.
Groeëte Optoch
Op maondig 3 mieërt trekt de groeëte optoch door ‘t Windjbuujelriek. Ouch al ligke d’r mèt name bie de sjtart in Óffebek nag get hindernisse oppe route, de gemeinte haet ós belaof det allein de Pater Claretsjtraot neet begaonbaar is en de res waal. Vanaaf 13.30 oeër vertrèk de ieërste deilnimmer en löp via de Keulsewaeg en Riekswaeg nao de merret oppe Ruiver. Wils se meidoon den kèn det via ‘t aanmeldingsformulier det geur vintj hie: https://windjbuujels.nl/inschriefformulier-groeete-optoch/. Meidoon kèn in de volgende categorieë: einlinge en duo’s, kleine groepe (3-8 pers), groeëte groepe (> 8 pers) en praalwages. Meld uch aan en zorg same mèt de angere deilnimmers, muziekgezelsjappe en hoeëgheje veur ‘ne bonte sjtoet op vastelaovesmaondig. En:Wagebouwers, opgelet! Net zoeë as aafgeloupe jaore mótte alle optochwages extra zien verzekerd mèt ein ‘optochtverzekering’.Veur de meiste is dit bekend wie te doon, mer moch geur hie nag vraoge euver höbbe: veur helpe uch gaer!Nim den contact mèt ós op via optoch@windjbuujels.nl Nim ouch effe good ’t optochreglement door, ouch hie sjteit belangrieke info in.Optochregelement – V.V. De Windjbuujels Op zóndig 2 mieërt trek d’r vanaaf 13:30 oeër weer ‘ne kinjeroptoch door de Óffebekse en Ruiverse sjtraote. Ouch die route geit via de Keulsewaeg en Riekswaeg, mer vanaaf dao nao de Sjakel wao de priesoetreiking plaatsvindt. Aanmelding kèn via ‘t digitale insjriefformulier op https://windjbuujels.nl/kinjeroptoch.