Oppe Ruiver, volges mich ’t sjoeënste dörp van Limburg. ’t Plekske wao zelfs de Venlose en Remunjse miense jaloers op kènne zien. ’t Dörp wao miense neet vergaete same te geniete van de kleine dinge in plaats van op zeuk te zien nao ’t groeëte gelök. Wao de Riekswaeg dit jaor verangerd in Route 66! ’t Is 21.30 oer, Körsaovend kump d’r aan en de vastelaoveskriebels euverheerse de Körssfeer. De Ruiver is bedeild mèt Windjbuujels en Windjbuujelinnekes die zich sjtraks gaeve aan de Körsborrels of aan de Körsfilms. En ich… Ich zit thoes oppe bank, mèt ’n Prinsemöts op. “Det is nuuëdig óm in te zjweite!”, zeije de leje van de Prinsekemissie… Ich twiefel nag sjteeds of ze mich veur de gek haaje en zich sjtiekem kostelijk amusere mèt dees gedachte. Toch nim ich ’t zekere veur ’t onzekere, ’t zou ens zoe zien. ’t Niejs is mich inmiddels in de sjoon gezak en ’t besef sijpelt good binne: “Prins van de Windjbuujels 2017”, sjiek! “En den ouch nag in ’t Jubileumjaor 6×11! ’n Groeëte tent oppe mert mèt ’n good programma, ekstra activiteite … ’t waert ’n biezónjer jaor. Vastelaovend viere as noeits te veure!” zei de Prinsekemissie die onaangekondig bie mien gezin binnesjtormde op ‘ne doordewaekse aovend. ’n Krat beer lichter en ’n ervaring rieker. “En det terwiel ózze huidige hoeëgheid Prins Peter de Ierste nog sjteit te zjweije mèt de scepter en nag neet klaor is mèt zien momente mèt ’n gouwe rendje. Zónne goeje höbbe veur nog noeijts gehad.” Pffff…Lek de lat maar hoeëg en veur de druk maar op PeeKaa! ’t Löp mich effe dun langs de boks… Gelökkig bliek det maar ’t fleske beer te zien det ich onhenjig langs mich höb geparkeerd. ’t Is omgevalle en ich had ’t neet in de gate, d’r zoot nog maar ’n bietje in. Ich fantaseer verder euver de vastelaovend en bedink det ich mich neet zoe druk mot make. Ich höb twieje waanzinnige adjudante wao ich trots op bön, die maake ’t fieës gans kompleet en mèt dit Trio zien we onversjlaonbaar! Wat kèn d’r noe misgaon? Brrrzzzzt… ’n berichtje van de Prinsekemissie: “De adjudante zien verantwaordelijk veur de Prinsemanjtel en en de Prinsevaere aan ’t einde van de aovend, die motte alik thoes kómme en weer truuk. En de Scepter mót geur ouch in de gate haaje, det kós ’n vaat beer asse dae kwiet raaks!” …. Die naate bóks veul ich weer aan mien bein plekke… Ich gaef toe ’t zien fantastiese jónges die de sjpraekwaordelijke kers op de vastelaovend gaon zette, maar of dit de juuste persoeëne zien veur dees verantwaordelikheid zet mich ff aan ’t zjweite (maar des den waal weer good voor de sjteek die ich op höb). Ich gaon ’t ze gewuuën zelf vraoge ’t antjwaord laes geur de volgende kier. Kei gaaf…Prins van oppe Ruiver… ich kèn neet wachte en ich höb d’r zin in! Mèt vrunjtelikke groet, Hoeëgheid Windjbuujels 2017
Buutte-aovend
Verkoup van de Sjterzitingkaarte gesjtart
De online verkoup van de Sjterzitingkaarte is gesjtart. http://www.windjbuujels.nl/etickets/
Sjtum op uche nieje Prins
Vanaf dit jaor is ’t meugelik óm via ós website uch sjtum oet te bringe op de persoeën wao det geur van dink det det de nieje waert. Sjtumme op dees wieze kèn toet en mèt vriedig 13 jannewarie as. Daonao zal ’t sjtumme mèt de gebroelikke sjtumlieëste door de Kinjeroptoch kemissie verzörg waere. Gangk nao de sjtumpagina
Infomiddig veur Windjbuujels’ Jeug
De infomiddig veur Windjbuujels’ Jeug waas informatief, nuttig en erg gezellig! De nieje jeskes, mötse en ’t nieje logo is geprizzenteerd en veur alle aanwezige is ’t noe duudelik wat veur doon!
Start online kaartverkoup Sjterzittinge | 18 dec. 12.00 oer
Veur ’t ieërs in de historie van de vereiniging waere de kaarte veur de Sjterzittinge allein online verkoch. Det beteikent det geur nimmer in de rie hoof te sjtaon bie Ronckenstein om (‘n) kaertje(s) te koupe. Geur krieg de kaarte digitaal toegesjtuurd wannier de betaling via ideal is voldaon. De kaartverkoop zal ónger ’t menu-item Etickets op det moment beschikbaar waere.
Wassink Autogroep
http://www.wassinkautogroep.nl
Muziekpartieje veur de Joekspkepel van “eine veur de joekskepel”
Op zaoterdig 12 november kwam “eine veur de joekskepel” as winnaar moet de bös van ózze Liedjesaovend. De muziekpartieje van deze nieje Windjbuujelsjlaeger kènt geur hie downloade. eine-veur-de-joekskepel-joekskepel-arr-partituur_en_partijen De tèks en muziek zien van Bas Geujen. ’t Arrangement is opgesjteld door S. Jenniskens en J. Killaars. Dees bewerking is gemaak door Herman Franssen.
Blageliedjesmiddig
Aafgelaupe zondig waas ’t auch weer tied veur de Blageliedjesmiddig. In de Sjakel waas jongk én aad op de bein om te komme loestere waem van de jonge deilnimmers hiej zou gaon sjtrieke mit de ier om auch op de vasteaoves CD te waere gezatte. Sinterklaos kwaam zelfs, nao aankoms oppe Ruiver, nao de Sjakel om de middig te aopene. D’r ware geweldige liedjes te huure en oeteindelik wiste de kinjer van ’t gengig gedaelte de ierste plaats te behaole mit ’t liedje Trumke. De twieëde plaats waas veur Marijn Hermans mit De Vastelaoves Dokter. Eine dieke Proficiat veur dees geweldige prestaties.
‘Eine veur de joekskepel’ Windjbuujelsjlaeger 2016-2017
De Gresbuus mèt ’t liedje ‘Eine veur de joekskepel’ is de nieje Windjbuujelsjlaeger 2016-2017. Wat ‘ne magnifieke liedjesaovend höbbe veur op zaoterdig 12 november gehad. Maar leefs 16 deilnimmers sjtónge oppe bühne. Van jóngk toet aad en van ervaren zengers toet mieërdere debutante. Veur ’t ieërs waerde alle deilnimmers begeleid door ’n 9 koppige live-band. Det goof ’t deze aovend ’n hoeëg jubileumcachet. Waanzinnig! ’t Waas efkes wachte oppe oetsjlaag. Maar ouch det waas neet onaangenaam. Joekskepel de Dorsvlaegels die al de ganse aovend de artieste nao en van de bühne begeleidde, brach de vastelaovessjtumming nao ’n hoeëgte punt. Nao twellef oer waerde de punten an ’t publiek en de jury bekend gemaak. De winnaar? Joekskepel De Gresbuus mèt ‘Eine veur de joekskepel’. Opoe twieëde plaats eindigde Marina mèt ’t liedje ‘Gewuuën same! De derde plaats ging nao De Praoskraozers mèt ‘De Prinsebloes’. Slaagveld ontving de aanmoedigingspries. Veur idderein ’n dieke prefisiat en dankjewel! Det geldt ouch veur de bandleje, de Dorsvlaegels en de kemissie.