Veur kènne de daag gaon aaftelle! Noe de fieësdaag en de Körsborrels verleje tied zien, kènne veur vol gaas op nao 15 fibberwarie. Ich kèn uch mitdeile det dit trio d’r ontiegelik väöl zin in haet. ‘t Kèn neet sjnel genog gaon toet 15 fibberwarie. Veur make ós al zoeëväöl veursjtellinge euver wat ós te wachte sjteit. Prinsebal mèt – as veur de Peekaa moge geluive – ‘n sjieke oetkomact en netuurlik bouwe we ‘n vastelaovesfieës mèt de band Stout. Den daags d’r op nag ’t Windjbuujelhijsse, ‘t Jeugprinsebal in Óffebek, de resepties, sjleuteleuverdrach, optochte, ós eige thoesgebeure enz, enz. Maar veur höbbe ouch genaote van ‘n sjoeën Mansluujzitting van ’t Trommel- en Fluiterkorps. Verder höbbe veur weer geheime bieeinkomste gehad en kump ’t plaetje zoëwie alles geit loupe, d’r sjteeds mieër kompleet oet te zeen. Gelökkig viere veur al ‘n paar jaor Vastelaovend en waere veur door de Peekaa klaor gesjtoump veur al die vastelaovesaktiviteite. Noe veur in ’t nieje jaor zitte, bön ich ouch gaon switche van meziek, Maria Carey, Queen en Flappie droet en op nao Spik en Span, Pruuf Mar, DEH, Rempetemp, W-Dreej en alle euverige LVK (halve) finaliste. En ózze eige Ruiverse vastelaovesmeziek netuurlik. As ’t efkes kèn, de uurkes in en heerlik genete van al dae Vastelaovesmuziek. Langkzaam aan waert ’t ouch sjpannend veur de angere nieje Hoegheje in ós Windjbuujelriek. Ich bön erg beniejd waem ’t allemaol geit waere. Waem waert de ieërste nieje Hoegheid? Krieg Windjbuujels’ Jeug ‘nne Prins of een Prinses? Waert ’t weer ‘ne jonge vent as Bacchus of kriege veur de ieërste vrouwelikke Bacchus? Wat zalle die Hoegheje al zenuwachtig zien want 24 en 25 jannewarie moge zie zich presentere aan de Ruiverse gemeinsjap bie ós residentie Ronckenstein. En den neet te vergaete, ’n waek veur ’t Prinsebal, ’t Boerebal, waem waert ’t nieje Boerebroedspaar mèt de Boerebroeloffemilie? Noe de letste waeke veur ’t oetkómme zien aangebraoke, gaon ich mich good veurbereije op de letste sjtökskes tèks die nag gesjreve motte waere, de veurbereidinge veur ’t thoesgebeure, diverse lieskes make veur speciale gelegenheje, zörge det ’t thoesfront de witte bloeze haet gesjtreke, ’t pak klaor hingk, de sjoon nag ens extra poetse, nag ‘n kapper aafsjpraok make en den nao ’t oetkómme nag ff kieke as veur motte helpe mèt ’t oprume van dae berg mèt klinkers oppe Keulsewaeg want die ligke toch éch in de waeg veur de optochte. As ich euver de Ruiver en door Offebek fiets den zeen ich die lantaarnpäöl mèt die sjoeën roed-gael-greune Prinsemötse al aan de päöl hange. Wat sjiek det Óffebek en Ruiver jaorliks zoë sjiek waere versierd. Ich wins uch alvas väöl plezeer bie de kómmende evenemente, buutteaovend en zittinge. En haopelik zien veur neet allein bezig mèt veurbereidinge veur de Vastelaovend maar ziet geur ouch al volop bezig mèt ongetwiefeld sjieke kreaties veur de (kinjer)optoch. Net veur 15 fibberwarie laot ich same met A1 en A2 nag weite as veur as trio en aanhang d’r veur de volle 111% klaor veur zien. Groet,Windjbuujelprins 2025
Kinjerzitting
Leef Windjbuujels, Windjbuujellinnekes en kinjer oet ’t windjbuujelriek. Euver 2 waeke is ós zittingenweekend, mèt op vriejdig de Buutteaovend en op zaoterdig de Sjterzitting. Dao helt ’t natuurlijk neet op, want op zondig organiseren veur namelijk de Kinjerzitting. Gaer nuuëdige veur alle kinjer oet ’t windjbuujelriek oet óm hie bie te zien! D’r zien optraejes van alle basissjoeële namelijk OJBS de Triolier, Basisschool Bosdael en Basisschool Meander. Ouch höbbe veur ’n optraeje geregeld van Stuuterbal, raeken d’r mer op det d’r gezonge, gedans en gesjpronge geit waere. Veur zeen ug gaer op zondig 2 Fibberwarie inne Sjakel!
Boerebroedspaar – Daagbookdeil 3
Leef Windjbuujels en Windjbuujellinekes, Boere en Boerinne. We laeve alweer efkes in 2025, de niejaorswinse en goeije veurnimmes zien genaome. Ouch veur als getuge höbbe veurgenaome om d’r dit jaor eine fantastische vastelaovend van te gaon maken en hie volop mèt idderein van gaon te genete! Veur zien drök bezig mèt alles in gereidheid te bringe veur zaoterdaag 8 fibberwarie en wat daonao allemaol kómme geit. Veur zien beniejd wat d’r allemaol op ós aaf geit kómme die daag. 8 fibberwarie is ‘t noe zoeë en den kènne veur eindelijk ós geheim, det veur al maondje meisjleipe, mèt uch deile. Als geheimagent 007 door ‘t laeve gaon is gemekkeliker, dae zaet namelik gewuuen det d’r Bond is of ja Boerenbond in dit geval. Euver de 8ste fibberwarie gesjpraoke, vergaet neet ugge boeren zakdook mei te nimme; dae kós waal ens nuedig zien! Verder mótte veur nog get puntjes op de i gaon zètte veurdet ‘t zoewied is, foto’s oetzeuke (zien veur waal blieve plekke?), liedje finetunen (dao is nog get discussie euver ontsjtaon ónger eine sjnaps), de oetkomact verzinne, wae geit aan welke kantj van ut broedspaar sjtaon en de pekskes toet ‘t letste detail op orde maken. Nag zat te doon maar zoe-as ‘t ‘ne boer betaamp, wèrke veur hie bienao daag en nacht aan. Maar dit doon veur mèt alle plezeer vanoet de fijnste plekskes in ós Windjbuujelriek en veur genete al van de veurpret. Mèt get drök op de kaetel kómme de beste ideeë meistal nao baove. Veur wille ouch nag waal ‘n aantal tips weggaeve euver wae veur zien. Zoe-as baovesjtaondj vermeld, woeëne veur op ‘t/de fijnste plekske(s) van ut Windjbuujelriek. Al os letters van ozze namen zien in dit sjtök verwerkt. Veur höbbe mèt ‘t körsreces nieks gebraoke. Veur höbbe zoewaal haor oppe kop als op de vot of waas ut honing…. Zien met de vastelaoevend meistal in ‘t Windjbuujelriek te vinje. Wèrke soms in ‘t Windjbuujelriek maar meistal dao boete. Veur sjporte gaer maar doon det te weinig. Veur zien neet vies van ‘n klusje aan hoes. Det is waal zat veur noe; veur mótte door mèt de veurbereiding. Windjbuujels en Windjbuujellinekes, Boere en Boerinne, veur zeen ós op ‘t Boerebal en wellicht op ein van de veurballen beginnende mèt de dames- en/of hierezitting en doanao aaftraeje en oetkómme Jeugprins(es). Verder winse veur de houfrolsjpelers van aafgeloupe jaor nag vuul plezeer mèt häör lètste activiteite. Geur höb ‘t allemaol fantatstisch gedaon, veur höbbe genaote van uch en haopelijk gaot geur ouch van os genete! Groetjes de getuge van ‘t broedspaar 2025!
Daagbook van de nieje – Deil 4
2025 is begós Naodet mien adjudanten nag net veur de Körs ‘t 3de daagbookdeil höbbe gesjreve, is ’t noe weer aan mich. Laot mich sjtarte met uch allemaol ‘n fantastisch en veural gezóndj 2025 te winse! ‘n Jaor det veur mich wie den ouch, zeker weijte, ontiechelik apart en sjiek geit waere. Nao de Körsdaag en Niejaor geit ’t den noe èch beginne, de veurbals en zittinge gaon sjtarte en dao höb ich versjrikkelik väöl zin in. De Körsdaag en Niejaor ware ouch sjpannender as de veurgaonde waeke, links en rechts waert d’r al mier gepraot euver de Vastelaovend en kómme d’r vraoge op taofel van: “En wèts se al waem de nieje Prins of ’t nieje Boerebroedspaar waert? Of Aadwief, Bacchus of Jeugprins(es)?” Op z’n momente höb ich ’t idee det mien sjnoet ’n kleurke krieg. En zeker nao die 11 punte wao mien adjudante häör identiteit al behuurlik pries höbbe gegaeve. En den höb ich nag ’n paar niejaorsborrels te gaon. Ondanks det, ouch van miene kantj ‘n aantal punte wao-in ich mien identiteit gaon pries gaeve:(1) Ich laef bes op groeëte voot. 4×11 det pas mich waal. Soms get mieër en soms get minder.(2) Ich werk waal ens op huuëgte (dus gen huuëgtevrees op de Prinsewage)(3) Ich bön beniejd welke angere Hoeëgheje mèt dezelfde sjpanning as veur as trio róndjloupe(4) Ich veul mich neet de aadste van ’t trio(5) Ouch mich duurt ’t te lang toetdet de Prinsebal is. Noe 2025 begós is, zal tiedes de versjillende vastelaovesactiviteite ouch mier geraoje kènne waere. ’t Maak gaar oet nieks oet as geur mich waal of neet raojt want ’t allerbelangriekste is det geur hiemei de Kinjeroptoch sjteunt. ’t Raoje op de windjbuujelsite begint ouch al vorm te kriege en sommige name waere al miermaols geneump. Zal ich dao ouch biesjtaon? De kómmende daag en waeke waere ouch nag sjpannend, omdet veur nag get zake mótte regele. D’r sjtaon bie-einkómste geplend mèt de adjudante, mèt de maedjes en mèt de hieëre van de Prinsekemissie. ’t Regele van versieringe veur thoes, de sjoon good inloupe en neet te vergaete, de nieje vastelaovessjlaegers oefene.Verder weijt ich nag neet wie de oetkomact d’r oet kump te zeen maar ’t sjient get geweldigs te waere as ich de kemissie moog geluive. Hie bön ich waal al hieël beniejd nao. Geur ouch? Bie deze vraog ich uch den ouch allemaol óm 15 fibberwarie al diek te óngersjtrepe in uche agenda óm nao de Sjakel te kómme (moch det nag neet gebeurd zien). Maar vergaet ouch neet al die angere vastelaovesveurbals, die ongetwiefeldallemaol sjiek zien, te bezeuke. Det bringk mich uch te herinnere aan ’t koupe van kaertjes veur de Buutte-aovend en de Sjterzitting via de site van VV de Windjbuujels. Gaer toet op ein van dees sjoeëne activiteite in ’t Windjbuujelriek! Veur zalle d’r zien! Windjbuujelprins 2025
Boerebroedspaar – Daagbookdeil 2
Leef Boere en Boerinne, Windjbuujels en Windjbuujellinnekes, De Körsdaag zitte d’r alweer op en langzaamaan make v’r ós op veur Aad op Niej. Dit jaor höbbe v’r mèt de Körs nag kènne genete van ’n lekker aajerwets diner, mèt fijne sjtökskes vleis en vès, en ’n lekker gleaske (sjpeciaal)beer of wien. Det zal kómmend jaor waal angers zien, den zalle veur as (on)ech Boerebroedspaar waal Moos met Bloodwors en Karboet oppe telder kriege. Wellich det v’r det mèt die Vastelaovesdaag ens kènne vraoge aan ’t huidige Broedspaar Sandra & Steven wie die det gedaon höbbe. Maar good, veur kieke veuroet, en waal nao Aad op Niej, wat dit jaor zeker weite waal ‘ne biezónjere zal zien, det prooste mèt ’n gleaske bubbels met alleman, en elkaar ’t beste winse heat veur ós, ós Getuge maar ouch veur de res van de Boerefemilie, wao den ouch, deze jaorwisseling toch ‘n döbbele beteikenis!Want mèt dees fieësdaag achter de rök begint ’t boerebal op 8 fibberwarie toch ech doeënbie te kómme. Sjpannend allemaol, höbbe v’r alles geregeld? Is aan alles gedach, zien v’r nieks vergeate? Zien de roeij zakdeuk gestreke? Tegeliekertied zien v’r ouch nag ontzettend drök mèt ’t regele van de lètste zake, de boerderie dreit op volle toere, zalle veur maar zègke… Maar det sjpel sjpeelt neet allein biej ós, zoeë kostte v’r aafgeloupe daag ouch laeze wie A1 en A2 van de Nieje Hoeëgheid van 2025 zich veursjtelde, bedank veur die tips trouwens…. Ongetwiefeld zitte ouch die volle bak in de veurbereidinge en de daobie behuurende sjpanninge. Ein feit is euverigens waal det die ‘n weak extra höbbe, det sjealt toch weer… Maar neet allein ’t Nieje Trio maak zich op veur ‘n onvergeatelik jaor, ouch ós eige Mini-Moos is dröm mèt alle veurbereidinge aan de sjlaag, net zoe as de Nieje Jeugdprinse of Jeugdprinssese, ‘t Niej Aadwief, en uiteraard de Bacchus, dea is volges ós waal al volop in training want in ’t ganse dörp zien al weake gen volle kratte beer mier te kriege. Neave al die veurbereidinge van de nieje veurgengers van 2025, zien ouch alle huidige hoeëghede nog volop in häör rol actief, en die höbbe nag vanalles op häöre agenda. Via deze weag wille veur, ouch names os getuge en de ganse Boerefemilie van de Boerebroelof van 2025 uch nog allemaol hiel väöl plezeer winse, haol d’r alles oet wat d’r in zit en geneet van ieder moment, ’t kèn zoemaar ut lètste fieësje zien in uch jaor as veurgengers. Veur noe winse veur uch allemaol ‘ne goeje roetsj, en ’t allerbeste veur 2025!!! En zjwei mèt dea roeëje zakdook ‘t nieje jaor teagemoet! Groetjes Boerebroedspaar 2025
Daagbook van de nieje – Deil 3
Windjbuujelinnekes en Windjbuujels, Boere en Boerinne, Naodet ózze Windjbuujelprins 2025 al twieë kieër get haet moge sjrieve, zien veur aan de beurt, A1 en A2. Veur höbbe al ’ne sjpannende tied achter ós ligke, want ouch ós is d’r alles aan gelaege óm de identiteit van ’t trio geheim te haje. Dao blieve veur ós bes veur doon en waem wèt lök ’t ós óm as verrassing oet ’t Kermis sjpoeëkhoeës te kómme. Veur de luuj die gaer al wille weite waem ’t nieje trio geit waere, alvas get informasie. • A1 en A2 kènne zich• En jao veur kènne de Windjbuujelprins 2025 ouch• D’r is gèn kefee in ’t Windjbuujelriek, wao veur nag noeits (efkes) gewaes zien• Veur werke allebei neet bie L1• Loupe euver sjtraot is neet gans vraemp veur ós• D’r zien miense die ós (her)kènne en d’r zien miense die det neet doon• ’t Laeve geit neet altied euver roeëze• ’t Duurt ós te lang toet det ’t Prinsebal is• As ós posters neet blieve plekke, veur doon det waal• Tom II, Rick en Willem, veur gaon d’r veur det veur ’t net zoeë sjiek kriege as uch• Alle angere Hoeëgheje van 2025, veur gaon same met uch knalle. De oplettende laezer haet gezeen det dees ellef punte, ós identitiet vriewaal pries gaeve. Toch kèn ’t zien det se d’r naeve zits. Maak ós nieks oet, veur gaon d’r same mèt ózze Windjbuujelprins 2025 ’n onvergaetelik sezoen van make. Det doon veur neet allein, maar mèt idderein óm ós haer en alle miense die van de partie zien. Toet sjlot: veur haope det de bühnekemissie van ’t Prinsebal haet genaote van de krat beer die häör gebrach is. Die höb geur verdeent mèt al uch werk óm ’t Prinsebal toet ’n sukses te make. Veur gaon aafsjloeëte, wellich toet bie de Mansluujzitting …………of Vrouwluujzitting! Fijn Körsdaag en ’n gezóndj 2025!A1 en A2
24 Jannewarie – Jeugprinsebal
Leef Windjbuujels & Windjbuujellinekes, Euver 5 waeke is ‘t zoeë wied, den is op vriedig 24 jannewarie ’t Jeugprinsebal! De kómmende waeke nimme veur ug mèt bie de veurbereidinge op dit spektakel. Zet geur ’t alvas in de agenda?! Speciaal veur de jeug en idderein dea van vastelaovend helt! En.… Fake Tits kómme optraeje! Waem wilt dit noe misse? Haopelik zeen veur ós op 24 jannewarie bie Café Ronckenstein vanaaf 19.00 oer
Fijn fieësdaag
Leef Windjbuujellinnekes & Windjbuujels, Veur winse idderein fijn fieësdaag en ‘ne goeje roetsj in ’t nieje jaor! Ouch dit jaor zien veur mèt de Hoeëgheden oppe foto gegange. Deze kier höbbe veur gekaoze veur ’t lètste Aovendmaol, mer den nét effe angers! Gèn broeëd en wien, mer heerlijke waofels en ‘n Veldmenke. Ein diekke merci aan Café Ronckestein veur de gastvrieje lokasie én natuurlijk aan de tenieëlvereiniging veur ‘t lieëne van de prachtige kleier! Maak d’r same ‘ne sjoeëne tied van!
Daagbook van de nieje – Deil 2
Gen Sissie Mien twieëde daagbookdeil wil ich beginne mèt ’t felicitere van trio Gesjat en de rietjes mèt ’t behaole van de finale bie ’t KVL. Ouch nog ‘ne proficiat veur PeeKaa lid Rob veur zien óngersjeiing as Lid van Verdeenste bie de Windjbuujels. Verder begin ich d’r al mieër aan te wènne det ich éch de poeës höb gevange. Noe Sinterklaos weer truuk is nao Sjpanje, kènne veur ós nag ieërs gaon klaormake veur de Körs en Niejaor. Dao is idderein netuurlik drök mèt, mèr veur höbbe ’t nag drökker. Tössedoor zien veur ‘n aantal kieër mèt ós trio en dames bie elkaar gewaes óm wat zake te regele. De dames höbbe ’t drök mèt häör kermis-/vastelaovespèkskes. Ouch veur as trio zien de pakke gaon passe en jao huuër, veur ós drie hadde ze ‘n passend pèkske mèt wit haemp hange. En as die zellefs ós passe den kènne d’r nag vuuël Ruiverse hiere Prins of adjudant waere. Langzaam begint ’t d’r den ouch éch op te lieke en kump 15 fibberwarie dónderbie. Ich höb begrepe det de band Stout oet Venlo al extra aan ’t rippetere is óm d’r ‘ne te gekke aovend van te make. Oeteraard mót d’r nag ’t ein en anger geregeld waere maar dao höbbe veur nag waal ’n paar daag de tied veur. Messjiens tiedes de Körs. ‘n Jaor gèn Sissie kieke maar ens gaon naodinke euver de tèks veur de kerk en de sjleuteleuverdrach. Ouch krieg ich mèt de daag mieër zin in de Mansluujzitting, de halve finales van ’t LVK, de Buutteaovend, de Sjterzitting en de Kinjerzitting. Nao de Körs lekker beginne mèt vastelaovesmeziek. Thoes en aaf en toe in de auto. Mèt dae vastelaovesmeziek get helder in de hoeskamer velt ’t neet zoeë op as ich sjpringend de sjoon aan ’t inloupe bön. Netuurlik waal blieve oplette, want d’r kènne mèn in de omgaeving woeëne die alles in de gate haje óm de nieje Prins te ontdekke. Ich zoog ouch det op de Windjbuujelsite ‘ne sjtart is gemaak mèt raoje waem ich bön. Beniejd wieväöl ’t d’r sjtraks good höbbe, want de chocomel en die krat beer mótte droet. Naeve de aktiviteite die ich al hiebaove sjreef, zien nag ’t aaftraeje van Jeugprins Hero I, ‘t oetkómme van de nieje Jeugprins(es) van de Windjbuujels, ’t sjeije van Boerebroedspaar Sandra en Steven, ’t oetkómme van ’t Boerebroedspaar 2025 en den nag ’t aaftraeje en opnimme van Prins Tom II mèt zien adjudante Rick en Willem. Dees Hoeëghede van 2024 wil ich nag hieël väöl plezeer winse in de letste waeke van uch vastelaovesjaor. ’t Kèn gen maot! D’r is nag van alles te doon veur det ‘t 15 fibberwarie is. Ich haop det geur as inwoeëners van ós sjoeëne Windjbuujelriek langzaamaan sjtart mèt de veurbereidinge van de Kinjeroptóch en de Groeëte Optóch, zoeëdet veur twieë sjieke en kleurrieke parades kriege. ’t Volgende sjtökske in ’t daagbook zal door mien adjudante gesjreve waere. Messjiens nag dit jaor. En den zal ich örges nao niejaor waal weer get op pepier zette. Sjloeët ich aaf óm uch te herinnere aan ’t koupe van kaarte veur de Buutteaovend en de Sjterzitting van de Windjbuujels op 31 jannewarie en 1 fibberwarie via de site van de Windjbuujels: https://windjbuujels.nl/etickets/ Zeen veur ós dao?! Windjbuujelprins 2025
Boerebroedspaar – Daagbookdeil 1
“Pèkskesaovend 2024” “Dao waerd(e) oppe deur geklop”…Nae, ’t waas nach lang gènne pèkskesaovend.Mer wae d’r dae aovend biej ós oppe sjtoep sjting…..waas waal vuul belaovend!! Waeks veur de herfsvekansie klopde de Boerebroelofskemissie bie ós oppe deur.Totaal onverwach, veur zoote al mèt “’t gemaak” aan oppe bank, versjoote veur –nim det van ós aan- kompleet van kleur. Nach gaar neet bezig mèt de vastelaovend van ’t kómmend jaor, hadde veur dit bezeuk noeijts van ze laeve verwach.Mer al gauw waerde duudelik wat ze kwaame vraoge, det zooge v’r gauw genóg, ouch al hadde zie toen nach nieks gezach… Lang hoofde veur d’r neet euver nao te dinke, de kogel waas gauw door de kerk.Nachte lang höbbe veur dae aovend planne gemaak en gefantaseerd euver wat kómme zól…..dit niejs krege veur neet zoë 1,2,3 verwerk. Netuurlik super verieërd, mer ouch gans verbaas keeke veur ós same aan; waem had det oets gedach, det ze ós kómme vraoge?Mer ’t besef is sjnel ingedaald, netuurlik höbbe veur “JAO” gezach: “veur waere Boerebroedspaar 2025!!” Dao is nieks aan gelaoge! Noe, inkele waeke later, zien d’r al flinke sjtappe gezatte en dreije ós köpkes euveroere.Os boerefemilie greuijt mèt de daag; ’t leefs wille veur ’t idderein vertelle, maar det kèn netuurlik neet. Waal veulse de miense in Óffebèk en oppe Ruiver sjtiekum loere. Veur höbbe al ‘ne haup sjoeën aovende gehad; mèt name mèt ós getuuge höbbe veur al hiel get sjieke planne zitte make,Kleier oetzeuke, ’n ontwerp make veur de medalies, liedjes sjrieve en gank zoë maar door. ’t Helt ós van de sjtraot en lu’t ós herses lekker krake. Mer de kómmende daag laote veur ’t boerelaeve efkes wie ’t is. Veur wachte braaf of “de goede Sint” ós ouch ’n pèkske kump bringe.Ein dingk is zeker, “vol verwachting klop ós hèrtje” zalle veur zeker same zinge. En as de Sint den weer same mèt zien Piete truuk nao ’t Sjpaanse landj vertrek,make veur ós op veur de volgende fieësdaag en nimp de körsversiering ziene intrek. Gezellig ’t hoes versiere, mèt lempkes, sjlingers en ‘ne sjieke körsbaum,Mer den, nao dae gezellige december maondj, den geit ’t veur ós ech beginne en kómme veur duchtig op sjtoum!!! Beste Windjbuujelinnekes en Windjbuujels, leef Boerinne en Boere, geneet van dees kómmende daag: aet, drink en höf same ’t glaas.En maak Uch daonao langzaam klaor veur de Vastelaovend 2025, want dees Boere gaeve gaas!!! As aafsjloeter haet dit Boerebroedspaar veur uch allemaol nach ein wieze les:De winjter sjteit veur de deur en det beteikent sjnóttere en sjnoeve. Haaj daorom altied ‘ne roeie boere zakdook oppe tès… Toet sjnel,’t Boerebroedspaar 2025